Dita e varfërisë Ruçi: Ndihma ekonomike e pamjaftueshme
"Të publikohen koeficientët e skemës për ndihmën ekonomike"
Në kuadër të Ditës Botërore të Varfërisë, kryetari i Kuvendit Gramoz Ruçi kërkoi nga qeveria përshpejtimin e politikave, që ndihmojnë shtresat në vështirësi ekonomike në Shqipëri.
Gjatë tryezës të organizuar në kuadër të Ditës Botërore të Varfërisë, Ruçi u ndal te skema e ndihmës ekonomike, duke theksuar se duhet më shumë transparencë për koeficientet që zbatohen në këtë formulë.
"Unë vlerësoj punën e Qeverisë për të modernizuar dhe rritur eficiencën e programit të ndihmës ekonomike, që ndihmën ta përfitojnë realisht të varfrit, jo abuzuesit. Kam ndjekur me vëmendje ankesat e qytetarëve për mospublikimin e vlerës së koeficienteve të formulës së vlerësimit. Pavarësisht argumenteve bindëse të Qeverisë dhe Bankës Botërore, do të sugjeroja që këta koeficiente të publikohen. Kjo do të rrisë transparencën e programit dhe do t'i edukojë familjet, që aplikojnë, të jenë sa më korrekte në deklarimet e tyre. Rreziku i mashtrimit prej aplikantëve mund të shmanget nëse administratorët socialë do të punojnë më shumë. Për të verifikuar saktësinë e deklarimeve, ata mund të përdorin më mirë të dhënat prej verifikimit ne terren",- tha Ruçi.
Në vijim të fjalës së tij, kryetari i Kuvendit u ndal edhe te pagesa e ndihmës ekonomike. Sipas tij, vlera e ndihmës ekonomike prej 8 mijë lekësh është e pamjaftueshme për të ndihmuar personat në varfëri dhe kërkoi që ky prag të rritet për t'u balancuar me nivelin e pensioneve dhe të pagës minimale në Shqipëri. "Të gjithë jemi të bindur që 80 mijë lekë të vjetra, janë absolutisht të pamjaftueshme për t'u garantuar jetesën minimale familjeve të varfra. Masa e përfitimit të ndihmës duhet të përditësohet, duke konsideruar dinamikën e kostos së jetesës në Shqipëri dhe t'i afrohet pragut të pagesës së papunësisë për individë. Në këtë mënyrë do të kemi një raport më të balancuar midis pagës minimale ( 240 mijë lekë), pensionit minimal ( rreth 130 mijë lekë) dhe ndihmës ekonomike",- u shpreh Kryetari i Kuvendit.
PENSIONET
Ruçi në fjalën e tij u ndal edhe te skema e pensioneve që aplikohet në Shqipëri. Sipas tij, të vetëpunësuarit në bujqësi duhet të futen në skemën e kontribuuesve të plotë të pensioneve, në mënyrë që të forcohet fondi i pensioneve. "Prandaj, sugjeroj të aplikohen mekanizma ligjorë dhe institucionalë që fermerët të binden të paguajnë kontributet në rrugë ekonomike, jo me falje nga Qeveria. "Një zgjidhje mund të ishte një program afatgjatë i mbështetjes me subvencione, me kusht që të paguajnë kontributet. Përvoja e subvencionimit e dy viteve të fundit ka sjellë rezultat inkurajues: mbi 30 mijë të vetëpunësuar janë pajisur me NIPT. Kjo do të kërkojë edhe ndryshimin ligjor- institucional, që kontributet për ta të mblidhen nga Tatimet, siç mblidhen nga të gjitha llojet e bizneseve dhe jo nga Sigurimet Shoqërore. Në këtë mënyrë do të realizohet edhe objektivi i Qeverisë që, për të shëndoshur skemën e pensioneve, numri i kontribuuesve në vitin 2021 të arrijë në rreth 1 milion, nga rreth 750 mijë që ishte në vitin 2017",- tha Ruçi.