Korrupsion për nota kaluese, 50- 100 euro
Arrestohen 3 sekserë, në hetim dhe 3 pedagogë në Elbasan
Merrnin 50 deri në 100 euro për një notë kaluese në provimet e vjeshtës, pranga tre sekserëve. Pesë muaj pas arrestimit të dekanit të Fakultetit të Shkencave Humane bashkë me dy pedagogë dhe tre sekserë, Policia e Elbasanit kanë vënë në pranga tre sekserë të tjerë, po për ndërhyrje për notat kaluese të studentëve. Policia ka finalizuar operacionin “Sezoni” pas një hetimi 2- mujor të nisur nga Prokuroria e Elbasanit. Tre të ndaluarit janë Skënder Stafa, 46 vjeç, lindur dhe banues në fshatin Precë e Poshtme, Elbasan; Qamil Murataj, 49 vjeç, lindur në Shikaj, Kukës dhe banues në Mëzes- Fushë, Tiranë dhe Medi Hana, 50 vjeç, lindur dhe banues në Skënderbe, Përrenjas. Burime pranë Prokurorisë bëjnë të ditur se këta tre shtetas janë mbajtur në përgjim pas denoncimit të bërë nga një student, i cili kishte paguar njërin prej tyre për të marrë notë kaluese në një prej provimeve të sezonit të vjeshtës. Nga përgjimi i telefonatave u zbulua se tre sekserët kryenin ndërmjetësimin, duke u marrë studentëve ngelës nga 50 deri në 100 euro për një notë kaluese në provimet që kishin të mbartura nga viti i kaluar akademik. Sipas hetuesve, tre sekserët, edhe pse nuk janë nga qyteti i Elbasanit, shfrytëzonin njohjet me pedagogët në universitetin “Aleksandër Xhuvani” dhe pasi u merrnin para studentëve ngelës, dyshohet se i ndanin paratë e fituara me ta. Prokuroria tregohet e rezervuar me detajet hetimore, por burimet tregojnë se në hetim janë dhe tre pedagogë, që dyshohet se janë të përfshirë në këtë çësh- tje. “Hetimi për tre të arrestuarit ka nisur dy muaj më parë, referuar denoncimit të një studenti, i cili kishte paguar për të marrë notë kaluese”, bëri të ditur Policia. Nga ana tjetër, lihet e hapur edhe pista se tre të ndaluarit mund të kenë mashtruar studentët për njohjet me pedagogët. Policia, në një deklaratë për mediat, sqaron se operacioni i koduar “Sezoni”, u krye nga Policia e Elbasanit me mbështetjen edhe të Njësisë e Forcës së Posaçme, pranë Drejtorisë së Përgjithshme të Policisë së Shtetit. “Nga Specialistët për Hetimin e krimit Ekonomik e Financiar u finalizua Operacioni Policor ‘ Sezoni’, në funksion të Procedimit Penal të vitit 2018, pas një hetimi 2- mujor në bashkëpunim me Prokurorinë Pranë Gjykatës së Shkallës së Parë Elbasan dhe Njësinë e Forcës së Posaçme, pranë Drejtorisë së Përgjithshme të Policisë së Shtetit, u bë i mundur dokumentimi ligjor i aktivitetit kriminal dhe ekzekutimi i urdhrit për ndalimin e të dyshuarve për krim, konkretisht: Skënder Stafa, 46 vjeç, lindur dhe banues në fshatin Precë e Poshtme, Njësia Administrative Funar, Bashkia Elbasan. Qamil Murataj, 49 vjeç, lindur në Shikaj Kukës dhe banues në Mëzes- Fushë, Njësia Administrative Kasash, Tiranë. Medi Hana, 50 vjeç, lindur dhe banues në Skënderbe, Njësia Administrative Rrajcë, Bashkia Përrenjas. Shtetasit e lartpërmendur ndërmjetësonin te pedagogët për të marrë notën kaluese në shkëmbim të vlerës monetare. Ndalimi i personave të sipërpërmendur u bë për kryerjen e veprës pe- nale ‘ Ushtrimit të ndikimit të paligjshëm ndaj personave që ushtrojnë funksione publike’”, bëhet e ditur nga Policia, ndërkohë që për arsye hetimi nuk bëhen me dije të tjera detaje.