Pompeo takon Erdogan për hetimet e “vrasjes” së Khashoggi
Sekretari Amerikan i Shtetit, Mike Pompeo, u takua të mërkurën me zyrtarë të lartë turq, përfshirë Presidentin Recep Tayyip Erdogan, pas deklaratave të udhëheqësve sauditë, se do t’i tregojnë të gjithë botës rezultatet e një hetimi të plotë rreth zhdukjes së një gazetari Jamal Khashoggi. Zyrtarët turq besojnë se gazetari, një kritik i ashpër i qeverisjes saudite, është marrë në pyetje, torturuar dhe copëtuar brenda konsullatës saudite në Stamboll, ku kishte shkuar për të marrë një dokument martese. Një incizim audio konfirmon këtë, sipas “The New York Times”. Sipas gazetës prestigjioze, disa persona ishin duke e pritur brenda konsullatës arabe gazetarin dhe gjithçka kishte ndodhur brenda pak minutave. Por zyrtarët sauditë e mohojnë këtë. Zhdukja e gazetarit saudit që shkruante për “Washington Post” ka dërguar në Arabinë Saudite Sekretarin Amerikan të Shtetit, Mike Pompeo. Por zyrtarët amerikanë, për hir të marrëveshjeve të tyre multimiliardëshe me Arabinë Saudite, por përpiqen të tregohen skeptikë ndaj akuzave për vrasje në konsullatë. Pompeo nuk ka bërë asnjë koment publik për bisedimet e tij me Presidentin Erdogan apo me ministrin e Jashtëm, Mevlut Çavusoglu, para largimit nga Turqia. Departamenti Amerikan i Shtetit ka publikuar një deklaratë ku thuhej se zoti Pompeo shprehu shqetësimin e Shteteve të Bashkuara lidhur me zhdukjen e Jamal Khashoggi dhe përsëriti gatishmërinë për të ndihmuar Turqinë në hetimin e saj. Khashoggi u pa për herë të fundit më 2 tetor, duke hyrë në konsullatën saudite në Stamboll. Gazeta “Wall Street Journal” njoftoi të martën vonë se operativët sauditë e rrahën dhe e droguan Khashoggin, pastaj e vranë dhe ia copëtuan trupin. Gazeta thoshte se zyrtarët turq u kanë dhënë zyrtarëve sauditë dhe amerikanë dëshmi, duke përfshirë detajet e një regjistrimi zanor. Të martën, hetuesit turq kanë kërkuar për prova në konsullatën saudite në Stamboll, ku panë se muret sapo ishin lyer, siç dyshojnë ata për të mbuluar provat dhe të mërkurën kanë vizituar shtëpinë e konsullit saudit në Stamboll.
Pompeo u tha gazetarëve të mërkurën para se të shkonte në Turqi se në takimet e tij me mbretin saudit Salman, princin e kurorës Mohammed bin Salman dhe ministrin e Jashtëm Adel al- Jubeir, “Ata u angazhuan për të mbajtur përgjegjës çdo njeri të lidhur me çfarëdolloj vepre penale, pavarësisht nëse janë oficerë ose zyrtarë të lartë”.