Mësuesia, Rama: 1 mijë dollarë për ekselentët “Bursa për të gjitha vitet nëse shkëlqeni deri në fund”
Kryeministri e ministrja e Arsimit, takim me studentët e shkëlqyer
Maturantët me mesatare mbi 9 që u regjistruan këtë vit akademik në një degë mësuesie, jo vetëm që nuk do të paguajnë tarifë shkollimi, por do të marrin edhe 1 mijë dollarë nga qeveria. Për t'iu komunikuar këtë, kreu i qeverisë Edi Rama mblodhi 260 kandidatët që sapo kanë nisur rrugën e mësuesisë me mbështetjen e qeverisë. Shuma, e cila do të përpjesëtohet për t'u dhënë çdo muaj, do të mundësojë minimalisht nevojat didaktike. "Së paku për të plotësuar nevojat për libra apo për materiale mësimore, të mos keni nevojë të kërkoni nga prindërit. Është puna juaj se si e shpenzoni pjesën tjetër të parave, nëse mbeten", nënvizoi Kryeministri në takimin e një dite më parë me ekselentët, që i dedikohen mësuesisë duke i paralajmëruar se nëse nuk e ruajnë mesataren që kanë edhe në vitet e tjera, mund ta humbasin bursën. "Kini parasysh që bursa e secilit dhe secilës prej jush do të vazhdojë edhe në vitet e tjera, në rast se ju do vazhdoni të jeni ekselentë deri në fund". E pranishme në takim, ministrja Lindita Nikolla bëri publike shifrat kokëforte, tregues i një cilësie të re në universitetet që përgatisin mësues, por edhe si garanci për sistemin arsimor. "Një vit më parë kishim 27.6% me mesatare nën 7, këtë vit zero. Në 2014- ën kishim në sistem edhe 1429 mësues që dilnin nga universitetet e mbyllura, sot nuk ka asnjë shans të blihet diploma në programe të tilla. Atëherë kishim dhe 2760 mësues të diplomuar part- time, që në shumicën e rasteve funksiononte po njësoj, madje dhe në universitete publike, duke shpenzuar para për të formuar cilësi tejet të ulët të mësuesve". Ministrja sqaroi edhe situatën në disa universitete në rrethe, ku shumë degë nuk kanë çelur dyert duke thënë se bëhej fjalë për programe që rrezikonin një sistem të tërë, pasi shumica e mësuesve të diplomuar rezultonin mbetës në provimin e shtetit. Sakaq, grupe të posaçme po punojnë për unifikimin e kurrikulave si dhe të standardizimit të programeve mësimore.