Pjesë e grupit kriminal në Greqi, pranga tepelenasit
Arrestohet në anën greke të Kakavijës, kishte urdhërarrest
Ai jetonte prej afro 15 vitesh në Greqi, ku ushtronte edhe aktivitetin e tij kriminal, që kryesisht fokusohej në trafikimin e lëndëve narkotike brenda dhe jashtë shtetit grek
Policia greke e Kakavijës ka arrestuar një shtetas shqiptar të shpallur në kërkim, pasi në shtetin fqinj rezultonte se ishte pjesëtar i një grupi të organizuar në fushën e drogës.
Sipas të dhënave, i arrestuari është E. Shehu nga Tepelena. Ai po udhëtonte me makinën e tij dhe ka kaluar pa asnjë problem nga territori i kufirit shqiptar. Por sapo i është nënshtruar kontrollit në pjesën greke të Kakavijës, ka rezultuar se 41- vjeçarit ishte i skeduar në listën e personave të shpallur në kërkim nga shteti helen. Ai ka kundërshtuar kontrollin e forcave policore dhe ka tentuar të bëjë rezistencë ndaj ndalimit.
Sipas të dhënave, E. Shehu që më parë njihej me mbiemrin Bleta, është ndaluar pas një urdhërarresti të Policisë greke, ndërsa nuk rezultonte si person në kërkim nga autoritetet shqiptare. Ai akuzohet nga Policia e shtetit fqinj për aktivitet kriminal dhe, sipas burimeve të Policisë, është i dyshuar për përfshirje në fushën e trafikut të drogës. “41- vjeçari dyshohet se është pjesë e një grupi të organizuar kriminal. Ai jeton- te prej afro 15 vitesh në Greqi, ku ushtronte edhe aktivitetin e tij kriminal, që kryesisht fokusohej në trafikimin e lëndëve narkotike brenda dhe jashtë shtetit grek”, bënë të ditur burime nga Policia, që është njoftuar në lidhje me këtë arrestim. Sipas të dhënave, 41- vjeçari tepelenas nuk ka qenë i shpallur në kërkim ndërkombëtar, ndaj edhe ka arritur të kalojë pa asnjë problem në pjesën shqiptare të Kakavijës. Ai ka kryer normalisht procedurat e kontrollit. Në Shqipëri ai njihet me mbiemrin Bleta dhe sipas të dhënave ka qenë i dyshuar për përfshirje po në fush- ën e narkotikeve, edhe në vendin tonë. Por nuk ka pasur prova për arrestimin e tij. Ndërkaq, nga pala greke, mësohet se disa kohë më parë, Prokuroria ka lëshuar urdhërarrest në ngarkim të tij si i dyshuar si një ndër pjesëtarët e një grupi të organizuar kriminal për trafikimin e drogës. Urdhërarresti, siç mësohet, është i ditëve të fundit, pasi 41- vjeçari është futur normalisht edhe herë të tjera në Shqipëri dhe nuk është ndaluar nga ana e Policisë greke. Ai ka qenë në përgjim prej kohësh dhe pasi janë siguruar prova është firmosur edhe fletëarresti.