Iu merrnin sirianëve 500 euro për t’i çuar në Tiranë, 3 në pranga
GJIROKASTER- Dy persona kanë rënë në pranga për veprën penale të dhënies ndihmë për kalimin e paligjshëm të kufirit, ndërsa një tjetër është shpallur në kërkim. Arrestimi në flagrancë i tyre është bërë nga shërbimet e FNSH- së Fier, në bashkëpunim me Specialistët për Hetimin e Trafiqeve dhe Narkotikëve në Drejtorinë Vendore të Policisë Gjirokastër. Sipas Policisë, të arrestuarit janë shtetasit Andrea Qerimi, 26 vjeç, banues në Tiranë dhe Artiles Zeqirja, 32 vjeç, banues në Tiranë. “Arrestimi i këtyre shtetasve u bë pasi në bashkëpunim me njëri- tjetrin kanë tentuar t’u japin ndihmë për kalimin e paligjshëm të kufirit tre shtetasve të huaj nga vendet MENA. Nga veprimet hetimore ka rezultuar se bashkëpunëtorë në këtë aktivitet ka qenë dhe E. Ll., 26 vjeç, banues në Bilisht, Korçë”, bëri të ditur Policia. Mësohet se Policia nuk ka rënë ende në gjurmët e tij, ndërsa 26vjeçari nga Bilishti është shpallur në kërkim. Nga hetimi i kryer ka rezultuar se trafikantët kishin mbyllur një pazar prej 500 euro për person me qëllim transportimin e klandestinëve nga Kakavija në Tiranë. Të tre sirianët kishin mundur të gjenin një mënyrë kontakti me trafi- kantët nga Tirana, duke komunikuar me ta nëpërmjet WhatsApp, me ndihmën e personave të tretë.
Kohët e fundit, ka shënuar rritje numri i klandestinëve të huaj nga vendet e Lindjes së Mesme dhe Afrikës Veriore ( MENA – Middle East and North Africa) që kanë rënë përgjatë këtij muaji në duart e Policisë Kufitare. Ndërsa muaji shtator u mbyll me një shifër prej 20 klandestinësh, tetori ka regjistruar deri tani rreth 60 shtetas të huaj, të ndaluar nga Policia e Kufirit në Gjirokastër. Rreth 400 klandestinë të paligjshëm janë kapur nga Policia Kufit- are e Gjirokastrës prej muajit qershor. Shifra më e lartë e këtij pesëmujori është shënuar në muajin korrik, me rreth 135 klandestinë të ndaluar. Por, shifra e klandestinëve që depërtojnë në kufirin shqiptar, duke iu shmangur kontrolleve të Policisë, të ndihmuar edhe nga trafikantët, dyshohet të jetë disa herë më e lartë se shifrat e raportuara në statistikat e Policisë së Shtetit. Korrupsioni në vetë radhët e uniformave blu ka vënë në pranga më 22 shtator të këtij viti, 6 efektivë të Policisë Kufitare të Kakavijës, tashmë të përjashtuar edhe nga radhët e Policisë së Shtetit. b. m