Naingolan KO, zikaltrit "të fashuar" me Barcelonën

Dhe tani Mesi. Në fakt jo. Mesi jo, por Barcelona. Është pas derës për Interin. Festa për fitoren në derbi nuk mund të zgjasë pafundësisht dhe nesër është një sfidë vendimtare. Pavarësisht 6 pikëve të marra në grupe deri tani, nuk mjaftojnë për të kaluar në fazën e ardhshme. Një fitore e mundshme në "Camp Nou" do të ishte mrekulli, por edhe një barazim do të shërbente shumë. Sepse një humbje do të rrezikonte situatën dhe do të hapte sërish çështjen kualifikim. Dhe tani në mendjen e të gjithëve është Barcelona, e cila është një tjetër gjë. Pavarësisht fitores në derbi. Por nga krosimi i Vesinos dhe nga koka e Ikardit mund të vijë shtysa e duhur për një mrekulli ose të paktën për të mos iu dridhur këmbët në "Camp Nou". Sepse për të thënë të vërtetën, kjo skuadër nuk ka shumë eksperiencë në Ligën e Kampionëve.

Energji- Derbi tregoi se ndërtimi i një grupi fitues vazhdon. Spaleti ka ngritur në këmbë një ekip të fortë nga ana psikologjike, përtej aspektit fizik. Tani ka edhe forcë në aspektin taktik, e aftë të neutralizojë kundërshtarin dhe të mos futet në panik me dyshen e mbrojtjes Shkrinjar- De Vraj. Ikardi është zyrtarisht në një seri pozitive, Vesino po shndërrohet në siguri, Politano nuk vuan më nga emocionet. Sinjalet pozitive janë të shumta, në momentin kur do të përballet me kundërshtarin më të fortë të këtij fillimsezoni.

Probleme- Por, derbi nuk sjell vetëm dhurata. Ka edhe shumë të fashuar, njerëz që çalojnë, muskuj që "bërtasin". Naingolan nuk do të jetë dhe do të mungojë disa javë. Ka ndrydhje të kaviljes. Për ta zëvendësuar është Borha Valero, i cili kalon nga i paaktivizuar në të rëndësishëm, ose Lautaro. Spaleti ndoshta nuk do të guxojë me këtë të fundit përpara se të gjejë ekuilibrat e nevojshëm. Perisiç u largua duke çaluar, ndërsa Brozoviç luajti me kofshën e fashuar në pjesën e dytë me Milanin. Galjardini nuk është në listë dhe kroati duhet të shtrëngojë dhëmbët, edhe për Barcelonën.