Ndreu, kundër Policisë për arrestimin e Ndokës
Felaj: Kush abuzon me pushtetin, për ne nuk ka ngjyrë
Deputeti i PS- së, Pjerin Ndreu, shprehu rezerva për sjelljen e Prokurorisë dhe Policisë së Shtetit për arrestimin e ish- kolegut të tij socialist, Arben Ndoka. Në një prononcim për mediat, pas mbledhjes së Grupit Parlamentar të PS- së, Ndreu sqaroi se nuk komentonte provat e paraqitura për Ndokën, por shprehu habi për faktin që kjo çështje është marrë në gjykim nga Prokuroria e Krimeve të Rënda, ndërkohë që e njëjta çështja për zyrtarë të tjerë po hetohet nga prokuroritë e rretheve. "Kam rezerva për mënyrën skandaloze të veprimit me zotin Ndoka, si e kanë arrestuar, sjelljen e shëmtuar që kanë bërë forcat policore aty dhe aplikimin e dy standardeve. Në një grup quhet grup i parëndësishëm dhe merret një prokurori lokale dhe një grup tjetër nga Prokuroria e Krimeve të Rënda. Mendoj se duhet të shikohen me qetësi këto gjëra. Normalisht, ne, edhe si filozofi që kemi si forcë politike, nuk mbështesim asnjë veprim të paligjshëm, por mënyra e të vepruarit të Prokurorisë dhe të Policisë në dy raste të ndryshme në Lezhë është e habitshme. Le të presim verdiktin e drejtësisë dhe flasim për të tjerat", deklaroi Ndreu, duke lënë të kuptohet se ndryshe nga kryebashkiaku demokrat i Lezhës, Fran Frrokaj, që po hetohet dhe gjykohet në Shkodër, Ndoka do hetohet dhe gjykohet nga Krimet e Rënda. Por, në mbështetje të veprimeve të Prokurorisë u shpreh deputetja e PS, Ermonela Felaj. Ish- prokurorja Felaj iu drejtua opozitës, duke kërkuar shpjegime në lidhje me pretendimet për kapje të organit të akuzës. "Çfarë do të thotë tani opozita për keqpërdorimin politik të Prokurorisë.", tha Felaj. Dy ditë më parë, në prangat e Policisë ranë dy ish- deputetët socialistë, Arben Çuko dhe Arben Ndoka. Emrat e dy ish- deputetëve dolën në përgjimet dyvjeçare të Policisë.