Ushqim me vete në shkollë, ja disa receta për të pasur fëmijë të shëndetshëm
Këshilla nga dietologia Rolina Naco
Me fillimin e shkollës, nisin edhe angazhimet, jo vetëm për fëmijët, por edhe për prindërit. Veç librave e artikujve të tjerë shkollorë, në çantë nuk duhet të mungojë edhe ushqimi që fëmija juaj do të konsumojë gjatë kohës që është larg shtëpisë. Për shumëkënd kjo është një sfidë më vete sepse të gatuash shëndetshëm, kërkon mbi të gjitha fantazi. Për këtë na vjen në ndihmë dietologia Rolina Naco, e cila, përmes këtij manuali të shkurtër, na udhëzon mbi recetat e shëndetshme që duhet të bëhen pjesë e vakteve për fëmijën tuaj. KËSHILLA NGA DIETOLOGIA ROLINA NACO
Ushqyerja e larmishme dhe e ekuilibruar nënkupton marrjen çdo ditë të ushqimeve nga të gjitha grupet ushqimore dhe të shpërndara në mënyrë harmonike gjatë gjithë ditës. Nuk ekziston asnjë ushqim i vetëm, që të përmbajë të gjitha vlerat ushqyese të domosdoshme për funksionimin dhe zhvillimin normal të organizmit të një fëmijë. Ndaj është e rëndësishme të kemi një ushqyerje të ekuilibruar dhe me sa më shumë ngjyra. Që fëmijët të rriten të shëndetshëm, duhet të edukohen që të hanë të gjitha ushqimet. Këshillohet të ushqehemi kryesisht me ushqime të stinës dhe të zonës ku jetojmë, pasi ato janë më të freskëta dhe më të lira. Mos harrojmë, që si larmia e ushqimeve, ashtu dhe shpërndarja në mënyrë proporcionale gjatë ditës, është e rëndësishme. Ndaj dhe për ta arritur ketë, nuk duhet të harrojmë mesvaktin e shkollës që fëmijët duhet të kenë me vetë. Çfarë ndikimi ka ushqyerja e shëndetshme te fëmijët tuaj:
Parandalon mbipeshën dhe problemet shëndetësore që lidhen me obezitetin në jetën e tyre si adultë. Bëhet pjesë e edukimit të tyre ushqimor. Përvetësohet si zakon edhe në të ardhmen e tyre. Përforcon sistemin imunitar, duke limituar në këtë mënyrë mungesat në shkollë. Shtohet energjia dhe përqendrimi gjatë orës së mësimit, duke shtuar përfshirjen e tij në mësim. Shtohet performaca dhe arritjet e tij në një shkalle më të lartë. Përmirëson gjendjen e tyre emocionale ( më të qetë dhe të duruar). Disa sondazhe tregojnë se kemi 40% ndryshim te femijët impulsivë dhe me temperament sanguin, të cilët kanë një sjellje me pak agresive dhe nervoze. Buka me vete
Të marrësh bukë me vete, të jep mundësinë të kontrollosh cilësinë e ushqimit, higjienën, datat e skadencës etj., por njëkohësisht dhe kombinimin e vlerave ushqimore. Për të gjitha sa thamë edhe më lart, roli i kujdestarit ( prindërit, gjyshërit) është shumë i rëndësishëm. Ata janë elementi kyç për t’i bindur dhe për t’i drejtuar fëmijët në rrugën e duhur të ushqyerjes. Është detyrë e tyre t’u shpjegojnë dhe t’u argumentojnë se përse duhet konsideruar si pjesë shumë e rëndësishme e përditshmërisë se tyre. Ata duhet t’i përfshijnë fëmijët edhe në përgatitjen e ushqimeve, për t’i bërë ata të ndihen më përgjegjës dhe të vetëdijshëm për këtë mënyrë të ushqyeri. Kujdestari dhe mësuesi nuk duhet të harrojë që ai është një model për fëmijët, ndaj dhe duhet të japë shembullin e tij. Është tepër me rendësi që fëmijët të inkurajohen për të marrë ushqimi me vete. Kujdestari dhe mësuesi duhet ta thyejnë ketë tabu. Çfarë duhet të dimë ose si duhet të jetë
Për grupmoshat nga 6 deri në 10 vjeç, nevojat kalorike ditore janë rreth 1700- 1900kcal. Një mesvakt në shkollë do të ishte mirë të përmbante rreth 20 me 25% të nevojave kalorike, që përkthehet të 350- 450kcal. Ky mesvakt, që të jetë i plotë, duhet të përfshijë të gjitha kategoritë e makronutrientëve dhe të mikronutrientëve. Makronutrientë: karbohidratet ( sheqernat), lipidet ( yndyrat), proteinat, fibrat ( të tretshme dhe të patretshme) dhe ujë. Këto mund të përdoren nga organizmi vetëm pas tretjes, e cila i transformon në përbërës të thjeshtë dhe lehtësisht të asimilueshëm.
Mikronutrientë: vitaminat dhe kripërat minerale esenciale, që hyjnë në sasi të vogla, të papërpunuara pas tretjes apo thithjes dhe janë të domosdoshme për të rregulluar realizimin e proceseve jetësore, si reaksionet enzimatike etj.