Qeveria përjashton “të fortët” edhe nga tenderët
Gjonaj: Jo fonde publike edhe kompanive me aksionerë të dënuar
Qeveria ka miratuar dje projektligjin që i ndalon çdo individi me rekorde kriminale, që të përfitojë fonde nga taksapaguesit shqiptarë në formën e tenderave apo koncesioneve.
Projektligji u prezantua nga ministrja e Drejtësisë, Etilda Gjonaj, e cila theksoi se ndryshimet e reja ligjore përjashtojnë edhe aksionerët, administratorët dhe çdo individ me rol vendimmarrës në shoqëri tregtare, që kanë qenë ose janë të dënuar. “Bëhet fjalë për të dënuar për vepra të rënda penale, që lidhen me krimin e organizuar, terrorizmin, trafikimin dhe korrupsionin. Ndalohet çdo mundësi që kjo kategori individësh, qofshin në shoqëri tregtare, aksionerë apo përfaqësues të tyre, të marrin para të taksapaguesve apo financime për aktivitetet e tyre. Me këtë paketë ligjore nuk do përfitojnë tendera publike apo koncesione asnjë kompani që rezulton e dënuar si subjekt juridik, por edhe kur të dënuarit i ka administratorë, përfaqësuesit drejtues apo aksionerët”, tha ajo. Masat shtrënguese të qeverisë ndaj këtyre personave janë shtrirë në katër projektligje. Konkretisht, bëhet fjalë për projektligjet që lidhen me prokurimin publik, investimet strategjike, turizmin dhe ndihmën shtetërore. Sipas ndryshimeve, personat që janë të dënuar për veprat penale nuk do të mund të përfitojnë nga këto ligje.
REAGIMI
Pas deklaratës së ministres së Drejtësisë Etilda Gjonaj mbi masat shtrënguese, ka reaguar Partia Demokratike. Këshilltari ligjor i PD- së, ishministri i Drejtësisë Gazmend Bardhi ka akuzuar qeverinë se ajo ka pasuruar persona, që sot janë në kërkim nga institu- cionit ligjzbatuese. “Ministrja e Drejtësisë e di se ligji që ndalon personat e përfshirë në krimin e organizuar të mos përfitojnë tendera dhe koncesione është në fuqi prej vitit 2006. Me ardhjen në pushtet të Edi Ramës, ky ligj nuk u zbatua dhe tenderat, koncesionet, PPP- të ranë në duart e trafikantëve të drogës dhe person- ave të tjerë të përfshirë në krimin e organizuar. Të shkruash me fjalë të tjera atë që sot ekziston në ligj, është tallje me shqiptarët dhe tentativë e qartë për të marrë në mbrojtje anëtarët e krimit të organizuar, që janë aktualisht nën hetim nga Prokuroria për përfitime të paligjshme në tendera publikë. Miku i Taulant Ballës, Edmond Bega, që ka përfituar 14 milionë euro nga punë publike, si dhe leje dhe licenca. Klement Balili, në kërkim ndërkombëtar për trafik droge, ka përfituar 77 tendera, nga të cilët 30 pa garë. Edison Sali, anëtar i bandës së Agron Xhafajt, ka përfituar 12 tendera gjatë qeverisë së Edi Ramës”, tha Bardhi.