Delegacion i lartë kinez te “Luarasi”, intershipe dhe bursa
Ruka: Bursa, shkëmbime e punë kërkimore të përbashkët
Universiteti “Luarasi” pritet ta shtrijë rrjetin e bashkëpunimeve deri në Kinë për më shumë intershipe, shkëmbime studentësh e pedagogësh apo kërkime shkencore.
Ky ishte qëllimi i vizitës së një delegacioni të lartë të arsimit kinez një ditë më parë në ambientet e “Luarasit”. Rektori i universitetit, prof. dr. Ethem Ruka, nënvizoi se ky është vetëm takimi i parë, ndërsa në një të ardhme të afërt do të shohim frytet e këtij takimi, ku përfitues do të jenë pedagogë e studentë. “Ky ishte një takim me të vërtetë interesant, një takim pune. Ishte rasti i parë që ne takohemi me përfaqësues të shkollave të larta të Kinës. Pritëm në universitet përfaqësues të tetë universiteteve të Pekinit, pra një grup që udhëhiqej nga zëvendësdrejtoresha e arsimit të lartë pranë Bashkisë së Pekinit. Ajo që më bëri përshtypje ishte gatishmëria e të gjithë këtyre institucioneve për të bashkëpunuar me “Luarasin”, qoftë në shkëmbim pedagogësh, në ofrimin e bursave të studimit për studentët, punë kërkimore të përbashkëta. Tani kemi vendosur kontaktet dhe shpresoj që ky bashkëpunim të jetë i frytshëm në të ardhmen”, tha rektori pas bisedës që pati me përfaqësuesit kinezë të arsimit, të cilët u njohën me universitetin, fushat e studimit dhe punën e tij ndër vite në arsimin e lartë në vend. Pasi u njohën me një pasqyrë të shkurtër të “Luarasit”, ata diskutuan ura të mundshme lidhëse midis universiteteve të dy vendeve dhe shprehën dëshirën e gatishmërinë që ky bashkëpunim të realizohet sa më parë, konkretisht në degët e përafërta të studimit. “Unë besoj dhe shpresoj që bashkëpunimi me ‘ Luarasin’ të jetë sa më i afërt, pasi vura re që disa degë studimi në këtë universitet janë të përafërta ose njësoj me degët tona. Dëshiroj shumë që të shkëmbejmë eksperienca me universitetin ‘ Luarasi’. Në takim më bëri më shumë përshtypje mikpritja e rektorit, pedagogëve dhe stafit akademik të ‘ Luarasit’. Ata treguan gjithashtu një interes shumë të lartë për bashkëpunim me universitetet kineze në të ardhmen”, u shpreh zëvendësdrejtoresha e arsimit të lartë pranë Bashkisë së Pe- kinit, Jin Honglian. Që në takimin e parë, stafi akademik i “Luarasit” diskutoi me delegacionin e arsimit kinez mbi shkëmbimin e pedagogëve dhe mundësinë e dhënies së bursave për studentët. Gjithashtu, në takim u shqyrtuan mundësitë për punë kërkimore të përbashkët dhe shkëmbim i informacioneve mbi kurrikulat akademike të universiteteve kineze dhe “Luarasit”.