Basha: Dako i pandehur, Rama plan për vjedhjen e zgjedhjeve
Alibeaj: Në media ka dalë vetëm maja e ajsbergut për “xhuxhin”
Kryetari i opozitës, Lulzim Basha, deklaron se përgjimet e Prokurorisë së bisedave mes kryebashkiakut të Durrësit, Vangjush Dako, dhe bandës së Avdylajve vërtetojnë se Rama ka pasur një pakt kombëtar për të vjedhur zgjedhjet.
Basha ka shprehur rezerva të forta në drejtim të Prokurorisë në lidhje me mosarrestimin e kryetarit të Bashkisë së Durrësit, edhe pasi ky i fundit pranoi se ka bashkëpunuar me këto banda në zgjedhje. “Tashmë është e qartë për këdo që Edi Rama ka pasur një plan të shtrirë mbarë vendit, për bashkëpunim me krimin për të vjedhur zgjedhjet. Duhet urgjentisht një hetim i posaçëm dhe i pavarur për këtë operacion kriminal. Vangjush Dako është i pari që duhet të merret i pandehur. Mosarrestimi i Vangjush Dakos, edhe pasi pranoi publikisht se ka bashkëpunuar me bandat për të dhunuar zgjedhjet, është shkatërrim i demokracisë dhe vdekje e drejtësisë”, tha Basha. Kreu i opozitës ka paralajmëruar Kryeprokuroren e përkohshme, Arta Marku, dhe drejtuesen e Prokurorisë së Krimeve të Rënda, Donika Prela, se do të mbajnë përgjegjësi të drejtpërdrejtë dëmtimin e provave dhe manipulimin e hetimeve të çështjeve që kanë lidhje me zyrtarë të lartë të qeverisë. “Dua t’i kujtoj dyshes MarkuPrela se dëmtimi i provave dhe manipulimi i hetimeve për krimet elektorale të Dakos, Ballës, Gjiknurit, Tahirit e të tjerë, është krim i rëndë, për të cilin do të mbajnë përgjegjësi. Kur Prokuroria mbron krimin, ka rënë shteti”, theksoi kreu i PD.
PËRGJIMET
Nënkryetari i Grupit Parlamentar të PD- së, Enkelejd Alibeaj, paralajmëroi të tjera përgjime që implikojnë kreun e Bashkisë së Durrësit, Vangjush Dako, me grupin Avdylaj. Në një deklaratë për mediat nga selia e PD- së, Alibeaj theksoi se përgjimet e publikuara për Dakon janë vetëm maja e ajsbergut. “Çfarë po qarkullon aktualisht në media është vetëm maja e ajsbergut për ‘ xhuxhin’, siç e quajnë miqtë e tij kriminelë, me të cilët ka blerë pushtetin e Edi Ramës. Vangjush Dako është pjesë kyçe e mekanizimit që Edi Rama ka ngritur për të ardhur në pushtet dhe për ta mbajtur atë nëpërmjet ‘ të fortëve’, trafikantëve të drogës, tutorëve të prostitutave, përdhunuesve dhe vrasësve. Strategjia për ta shitur bashkëpunimin me krimin si normalitet politik, synon të mpijë reagimin e shoqërisë, kërkon të imponojë pranimin e krimit si pjesë të shëndetshme të saj, duke shkuar kështu drejt asgjësimit të demokracisë në vend”, tha Alibeaj. Sipas demokratëve, vetëm nga bashkëpunimi i kriminelëve me politikën, PS ka arritur të fitojë të paktën 15 mandate parlamentare. Partia Demokratike është e bindur se në dosjen 339/ 2016 në Prokurori është i implikuar kryebashkiaku i Durrësit dhe kërkon që menjëherë organi i akuzës të lëshojë urdhërarrestin për Vangjush Dakon.