Gjendet dërguesi i bombave për elitën liberale në SHBA
I dyshuari si autori i dërgimit të bombave me postë në SHBA, që synon kritikët e Presidentit Donald Trump, është identifikuar si Cesar Altier Sayoc, 56 vjeç. Ai u arrestua të premten në mëngjes në Plantation, Florida, si personi që dërgoi 12 paketat e dyshimta këtë javë. Sayoc është tifoz i Trump- it dhe ka postuar në faqen e tij në “Facebook” foto dhe video të tij në një nga tubimet e Presidentit, në tetor të vitit 2016. Ai ka postuar një fotografi të vetes me një kapelë MAGA përballë Capitol në SHBA, në vitin 2017. Sayoc ka precedentë penalë për hedhjen, vendosjen, projektimin dhe shkarkimin e pajisjeve shkatërruese, akuza për të cilat është dënuar në vitin 2002 në Florida. Ai pretendon të jetë amerikan i hershëm, por besohet se Sayoc është filipinas. Sayoc është promotor i trupës mashkullore të striptizëve “Chippendales” dhe është i regjistruar në një program të mjekësisë veterinare. Një furgon që besohet të jetë i Sayoc, ishte i mbuluar me ngjitëse që shprehnin admirimin për Trump- in dhe denigronin demokratë të shquar, si Hillary Clinton dhe Barack Obama, të cilët ishin ndër ata që u kishin dërguar bomba- tub këtë javë. Një tjetër ngjitëse në xhamin e furgonit shkruante “CNN ta shpif”. Rrjeti kabllor ka marrë dy nga paketat e dyshimta në Manhatan. Të 12 bombat besohet se janë dërguar duke përdorur një ndërtesë rajonale poste në Floridën Jugore. FBI- ja ka paralajmëruar publikun të bëjnë kujdes se mund të jenë dërguar bomba të ngjashme në adresa të tjera.