LISTA ME 1700 EMRAT Ish- të përndjekurit, si përfitohet kësti i tretë

Pesë dokumentet që kërkohen nga Financat, që trashëgimtarët të marrin këstin e tretë të parave. Si do ndahet fondi 300 milionë lekë

Janë 1700 të dënuar, dosjet e të cilëve janë shqyrtuar për t'u trajtuar me dëmshpërblim. Me firmosjen e urdhrit nga ministri i Financave, Arben Ahmetaj, për çeljen e këstit të tretë, Drejtoria e Pagave dhe Dëmshpërblimeve ka njoftuar trashëgimtarët që të bëjnë plotësimin e dosjes.

Gazeta boton edhe një herë të plotë tabelat me emrat e përfituesve. Familjarët e të dënuarve që do të gjejnë emrin në listë duhet të dorëzojnë në Ministrinë e Financave: dëshmi trashëgimie ligjore për të dënuarin politik, certifikatë vdekje e ish- të dënuarit dhe certifikatë e trungut familjar, të cilat mund të sigurohen edhe përmes sistemit online; mjafton një autorizim me shkrim. Po ashtu, numër llogarie bankare ku do të bëhet edhe derdhja e parave si edhe dokument identiteti për çdo trashëgimtar ose të personit që ka prokurë të posaçme për tërheqjen e dëmshpërblimit. Pagesat, është bërë me dije nga Financat, se do të kryhen bazuar në rendin kronologjik, çka do të thotë se ata, të cilët kanë mundur ta marrin ndër të parët këstin e parë të dëmshpërblimit, do të kenë mundësi të përfitojnë edhe këstin e tretë.

FONDI Duke qenë se fondi i mbetur është i limituar, kujtojmë që janë vetëm 300 milionë lekë që do të ndahen deri në fund të vitit; një pjesë e tyre do të kenë mundësi të marrin këstin e tretë në këtë fazë. Pjesa tjetër do të vendoset në listë pritje për muajin janar, atëherë kur hyn në fuqi edhe buxheti i ri. Për vitin 2019 janë 2 miliardë lekë. Ndryshimet ligjore që u miratuan në fillim të muajit shtator të këtij viti parashikojnë që kur të likuidohen në mënyrë të plotë ish- të përndjekurit që jetojnë, i gjithë fondi vjetor do të shkojë për kategorinë joparësore që janë trashëgimtarët. Kjo pritet të sjellë një hov në ndarjen e pagesave. Ministria sqaron se për këstet vijuese, kur nuk ka kontestim nga rrethi i familjarëve ose të trashëgimtarëve apo ndryshim të statusit, është i mjaftueshëm dokumentacioni i dorëzuar me herët. Pra, nuk do të kërkohen më dokumente të tjera shtesë.

AFATET Për plotësimin e dosjes familjarët e të dënuarve kanë afat 3vjeçar. Pra, nga dita e shpalljes së njoftimit, trashëgimtarët kanë 3 vite kohë në dispozicion. Nëse nuk paraqiten gjatë kësaj periudhe për t'u interesuar mbi fatin e dosjes së tyre, atëherë dëmshpërblimi digjet, rrjedhimisht e drejta e përfitimit ndërpritet.

NDRYSHIMET Nga ana tjetër, Ministria e Financës ka gati edhe dosjet e të dënuarve, të cilëve u është caktuar një masë dëmshpërblimi më e vogël se 1 milion lekë të rinj. Me miratimin e ndryshimeve ligjore në shtator të këtij viti, këtyre familjeve u krijohet mundësia për ta marrë të plotë pagesën, pra, nuk do të jenë të detyruara t'i nënshtrohen skemës së pagesës me këste. Likuidimi i tyre do të bëhet i plotë. "Në kuadër të shmangies së burokracive dhe të lehtësimit të ish- të dënuarve politikë të regjimit komunist, është menduar likuidimi me anë të një kësti ( pagese) të vetme, të të gjithë vlerës totale të dëmshpërblimit, në ato raste kur vlera e miratuar me vendim të Këshillit të Ministrave është deri në 1 milion lekë", përcaktohet në ligjin e ndryshuar.