Guvernatori Sejko: Rritja ekonomike 4,4%, si do përshpejtohet
Rama: Reformat strukturore do të vazhdojnë, Banka e Shqipërisë përbën një mbështetje shumë solide dhe garanci për çdo qeveri
Banka e Shqipërisë, në bashkëpunim me Shkollën Ekonomike dhe të Shkencave Politike të Londrës organizoi dje konferencën vjetore me temë "Politika monetare, integrimi ekonomik dhe normaliteti i ri".
Guvernatori i Bankës së Shqipërisë, Gent Sejko, në hapje të konferencës deklaroi se ekonomia shqiptare gjendet në një trajektore të qëndrueshme e pozitive të rritjes ekonomike dhe politikat ekonomike të ndjekura kanë krijuar premisa për shfrytëzimin e plotë të kapaciteteve prodhuese dhe për kthimin e inflacionit në objektiv. "Sipas statistikave zyrtare, rritja ekonomike e vendit u përshpejtua në 4.4 për qind në gjashtëmujorin e parë të vitit, duke shfaqur një bazë të gjerë në terma të përbërësve të kërkesës agregate dhe një kompozim të larmishëm në terma të sektorëve që kanë kontribuuar në rritje. Në veçanti, eksportet shqiptare kanë shfaqur rritje, ndërsa nivelet e investimeve të huaja direkte kanë mbetur të larta, duke ndihmuar në ngushtimin e deficitit të llogarisë korrente dhe në qëndrueshmërinë e pozicionit të jashtëm të vendit. Dinamizmi i sektorit eksportues dhe nivelet e larta të investimeve të huaja janë inkurajuese në drejtim të qëndrueshmërisë së rritjes ekonomike dhe dëshmi e kompetitivitetit dhe atraktivitetit në rritje të ekonomisë shqiptare", u shpreh Sejko. Më tej, Guvernatori Sejko u ndal në temën e konferencës vjetore të Bankës së Shqipërisë, e cila ka të bëjë me sfidat që shtrohen përpara politikëbërësve si në terma të rritjes, ashtu dhe në terma të stabilitetit ekonomik e financiar. "Në një këndvështrim më specifik, realiteti i sotëm ekonomik, monetar e financiar, paraqitet veçanërisht sfidues për politikën monetare. Ky realitet emërtohet dhe si ' normalja' e re e politikës monetare. Më lejoni të identifikoj disa prej këtyre sfidave. Normat natyrore të interesit paraqiten në rënie, potencialisht si pasojë e një kombinimi faktorësh: ngadalësimi i produktivitetit dhe i ritmit të inovacionit; trendet e pafavorshme demografike në vendet e zhvilluara; apo dhe riciklimi i kursimeve nga vendet në zhvillim drejt atyre të zhvilluara. Kjo rënie sjell reduktimin e hapësirave për politika monetare stimuluese konvencionale në të ardhmen", u shpreh Sejko. Guvernatori nënvizoi se politika monetare shpesh përballet me efektivitet të kufizuar dhe e vetme ajo nuk disponon instrumentet e duhura për të gjeneruar një përshpejtim të qëndrueshëm të ritmit të rritjes në afatin e gjatë.
RAMA
Kryeministri Edi Rama deklaroi se në fokus të axhendës së qeverisë është vazhdimi i ciklit të dytë të reformave, duke vlerësuar rolin solid të Bankës së Shqipërisë. Kryeministri Rama vlerësoi bashkëpunimin me Bankën e Shqipërisë për uljen e nivelit të kredive të këqija. "Reforma strukturore mbeten fokusi ynë kryesor. Domosdoshmëria për t'i dhënë qëndrueshmëri rritjes evidente dhe të vazhdueshme ekonomike mbetet sfida jonë kryesore. Banka e Shqipërisë përbën një mbështetje shumë solide, por në të njëjtën kohë edhe një garanci shumë të fortë në raport me qeverinë tonë dhe me çdo qeveri që, edhe për shkak të pozicionit solid dhe tërësisht të pavarur të Bankës së Shqipërisë, ka një horizont shumë më të kufizuar, në kuptimin më pozitiv të fjalës. Faktikisht, katër vjet më parë kishim 24 për qind kredi të këqija. Sot, niveli i tyre është në 13%. Besoj që është një shembull domethënës për ecurinë në tërësi, por edhe për funksionimin e bashkëpunimit me Bankën e Shqipërisë që, jam i bindur, do të vazhdojë të rezultojë pozitiv në vijim, përgjatë ciklit të dytë të reformave që ne po ndërmarrim", tha Rama.