“Dokumenti i Tahirit nga Italia, i pavlerë”
PD: Prokuroria të kërkojë arrest me burg për ish- ministrin
Ish- ministri i Drejtësisë dhe këshilltari ligjor i PD- së, Gazment Bardhi, e cilëson dokumentin e autoriteteve italiane për pafajësinë e ishministrit Saimir Tahiri si të pavlefshëm. Në një reagim për mediat pas deklaratës publike të Tahirit, këshilltari ligjor i PD- së sqaroi se hetimi italian nuk ka asnjë lidhje me akuzat e ngritura nga organi i akuzës për krimet e kryera në Shqipëri. Sipas përfaqësuesit të PD- së, me deklaratën e tij ish- ministri i Brendshëm paracaktoi vendimin e Prokurorisë për të mbyllur hetimet. “Saimir Tahiri, njësoj si Edi Rama paracaktoi sot vendimin e Prokurorisë për të mbyllur dosjen e përfshirjes së tij në trafik droge. Partia Demokratike e paralajmëroi dy ditë më parë se Saimir Tahiri do të shiste një vendim të autoriteteve italiane si çlirim nga akuzat në Shqipëri. Shqiptarët duhet ta dinë se Saimir Tahiri është hetuar nga autoritetet italiane vetëm për veprimtari kriminale në territorin italian. Dokumenti që ai valëvit për pafajësinë e tij është i pavlerë për veprimtarinë e tij kriminale në Shqipëri. Hetimi italian është i parëndësishëm dhe nuk ka lidhje FARE me hetimin në Shqipëri. Saimir Tahiri NUK i ka kryer krimet në Itali, por në Shqipëri: Ai bashkëpunoi me Habilajt në Shqipëri. U vuri atyre në dispozicion shefat e Policisë në Vlorë që janë në arrati nga drejtësia. Vuri në dispozicion të trafikut të drogës të paktën 127 punonjës policie. u vuri në dispozicion Policinë Kufitare, u vuri në dispozicion makinën dhe skafin e tij personal”, tha Bardhi. Për ish- ministrin e Drejtësisë, me kërcënimin që Tahiri u bëri prokurorëve dhe dëshmitarëve që janë bërë pjesë e dosjes së tij, ai duhet marrë si i pandehur. “Tahiri kërcënoi në mënyrë mafioze indirekt edhe të gjithë ata që kanë dëshmuar apo kanë prova kundër tij. Pas këtyre kërcënimeve, Prokuroria duhet të kërkojë ndryshimin e masës së sigurisë nga ‘ detyrim para- qitje’ në ‘ arrest me burg’ për Saimir Tahirin. Sot ai jo vetëm ka kryer vepër penale duke kërcënuar punonjësit e drejtësisë, por ka vërtetuar se, nëse mbetet i lirë, ai përbën rrezik për pavarësinë, prishjen e provave dhe vazhdimin e hetimeve”, theksoi këshilltari i PD- së.