Frei: Largimi i Fatmir Xhafajt hap pozitiv, mister largimi
Raportuesi i Grupit Parlamentar CDU/ CSU për Shqipërinë, Thorsten Frei, është i mendimit se dorëheqja e ministrit të Punëve të Brendshme, Fatmir Xhafaj, është një hap pozitiv në drejtimin e duhur. I pyetur nga "Deutsche Welle", Frei ka thënë ndër të tjera, se për të arritur statusin e kandidatit, Shqipëria duhet të bëjë edhe shumë më tepër në luftën kundër krimit të organizuar, gjendja e të cilit, sipas tij, është shqetësuese. Deputeti gjerman pret rezultate të shpejta në këtë drejtim nga pasardhësi i tij.
"Është e vështirë të gjykosh së largu se cilat kanë qenë shkaqet e dorëheqjes së tij. Dhe nuk më takon mua, sidomos kur në Shqipëri, diskutimet për këtë çështje nuk kanë të sosur. Sidoqoftë, unë e kam theksuar gjithnjë, se thashethemet dhe supozimet e lidhura me zotin Xhafaj edhe për ca kohë do të ishin të papranueshme politikisht në Gjermani. Unë mendoj se dorëheqja është një tregues tjetër në drejtim të luftës kundër korrupsionit dhe krimit të organizuar, përkatësisht shkëputjes nga politika".
Deputeti i Bundestagut theksoi gjithashtu për "Deutsche Welle"- n, se është i bindur se ky nuk mund të jetë hapi i fundit. "Qeveria duhet t'i zgjerojë shumë më tepër dhe më me vendosmëri përpjekjet e saj në këtë sektor. Është e vërtetë që ndërkohë janë bërë përparime të mëdha me vetingun. Por unë jam ende shumë i shqetësuar për gjendjen e krimit të organizuar. Kjo pikë do të luajë në fillim të verës së ardhshme një rol shumë vendimtar, kur në tryezë të kthehet sërish çështja e negociatave të anëtarësimit. Mbetet të presim se cili është roli që do të luajë pasardhësi i tij dhe se a do të jetë në gjendje ai të dëshmojë rezultate të shpejta. Unë jam optimist i rezervuar, se dorëheqja e Xhafajt është për vendin një hap i vogël pozitiv përpara dhe drejt Europës".
Të shtunën e kaluar, Kryeministri i Shqipërisë, Edi Rama, bëri të ditur nëpërmjet një lajmi në "Twitter" se kishte pranuar dorëheqjen e Fatmir Xhafajt nga posti i ministrit të Punëve të Brendshme dhe se në vend të tij do të emëronte këshilltarin e vet për çështje sigurie, Sandër Lleshin. Xhafaj e dha dorëheqjen pasi kishte arritur një sukses të madh në luftën kundër krimit të organizuar, duke shkatërruar një qark prodhuesish dhe kontrabandistësh droge në Shqipëri. Suksesi u arrit në bashkëpunim me Policinë gjermane. Lufta kundër krimit të organizuar është një nga kushtet që Grupi Parlamentar CDU/ CSU, ka vendosur për Shqipërinë për të hapur negociatat e anëtarësimit në BE.
Sandër Lleshi ka mbajtur më parë postin e atasheut ushtarak të Shqipërisë në Gjermani, si edhe ka qenë zëvendësshef i Shtabit të Përgjithshëm të Forcave të Armatosura. Para propozimit për emërimin e tij në krye të Ministrisë së Brendshme, Lleshi ka qenë këshilltar për sigurinë i Kryeministrit Rama. Për emërimin e tij në krye të Ministrisë pritet dekreti i Presidentit Ilir Meta, i cili më pas duhet të kalojë për votëbesim në Parlament.