Meta, edhe 24 orë afat për Lleshin, ngërçi për dekretin
Kërkesë në Ministrinë e Mbrojtjes për detyrat ushtarake
Presidenti i Republikës, Ilir Meta, ka vendosur të përdorë të gjithë afatin ligjor që i ka dhënë Kushtetuta për t’u shprehur me dekret për Sandër Lleshin, propozimin e Kryeministrit Rama për ministër të Brendshëm.
Pavarësisht se nga e shtuna e 27 tetorit ka në tryezën e tij këtë propozim, udhëtimet zyrtare jashtë vendit, por edhe konsultat e detyrueshme me institucionet kushtetuese për t’u informuar në lidhje me këtë kandidaturë, kanë marrë kohën e plotë kushtetuese për dekretin. Duke marrë parasysh ditën në të cilën kreu i qeverisë propozoi Sandër Lleshin për ministër të Brendshëm, rezulton se Presidenti i Republikës ka afat deri paraditen e kësaj të shtune për t’u shprehur me dekret. Aktualisht, kreu i shtetit është shprehur me dekret vetëm për shkarkimin nga detyra të Fatmir Xhafajt si ministër i Brendshëm, por jo për emërimin e gjeneralit Sandër Lleshi. Deri në mbrëmjen e kësaj të enjte, Presidenti Meta ka qenë në vizitë zyrtare në Firence të Italisë, ku edhe është takuar me kardinalin Ernest Simon Troshani.
NGËRÇI Burime për “Panorama” bëjnë me dije se më tepër se pritja në respekt të afatit të sanksionuar me ligj, flitet për një ‘ ngërç’ lidhur me të zgjedhurin e ri, Sandër Lleshi. Bëhet fjalë për faktin nëse ai mban ndërkohë ndonjë pozicion tjetër në Forcat e Armatosura apo jo. Për këtë, Presidenca i është drejtuar me kërkesë zyrtare Ministrisë së Mbrojtjes, në të cilën i kërkon informacion nëse Lleshi mban ende ndonjë detyrështetërore apo jo. Kërkesa e Presidencës bëhet në mbështetje tëKushtetutës së Shqipërisë, saktësisht në nenin 103 të saj ku theksohet: ” Ministri nuk mund të ushtrojë asnjë veprimtari tjetër shtetërore dhe as të jetë drejtues ose anëtar i organeve të shoqërisë civile. Ministri nuk mund të ushtrojë asnjë veprimtari tjetër përveç detyrës së tij si min- istër”. Burime nga Presidenca sqarojnë se sot kreu i Shtetit do të shprehet publikisht lidhur me çështjen e dekretit të ministrit të Brendshëm.
PRECEDENTI Për ironi, precedenti i fundit me vonesat e dekretimit të një ministri ishte ai për emërimin e ish- ministrit Fatmir Xhafaj në krye të Ministrisë së Brendshme. Ish- Presidenti Bujar Nishani mori të gjithë afatin që i kishte vendosur në dispozicion Kushtetuta për t’u shprehur me dekret për emërimin e tij. Nishani foli publikisht në media para se të firmoste dekretin, duke theksuar se pavarësisht se do të donte ta rrëzonte emrin e Fatmir Xhafajt, Kushtetuta nuk ia lejonte atë veprim.