Beteja ligjore e Lleshit për të qenë gjeneral
Si e fitoi betejën gjyqësore dhe dëmshpërblimi me paga
Ministri i Brendshëm i propozuar nga Kryeministri, i cili është ende në pritje të dekretimit nga Presidenti Meta, Sandër Lleshi, në vitin 2013 është përballur me një kalvar gjyqësor. Lleshi, në maj të vitit 2013 është nxjerrë në lirim me dekret nga Presidenti i kohës, Bujar Nishani. Ky propozim është bërë nga ish- ministri i Mbrojtjes, Arben Imami, me urdhër nr. 1093 dt. 27.05.2013. Vendimi i Presidentit është marrë më datë 21 maj të vitit 2013 dhe në të argumentohet se Sandër Lleshi lirohet nga detyra e zëvendësshefit të Shtabit të Përgjithshëm të Forcave të Armatosura. Po ashtu, ai është nxjerrë në lirim dhe nga funksioni i gjeneralit të Brigadës. "21 maj 2013 Presidenti Nishani dekreton lirimin nga detyra të zëvendësshefit të Shtabit të Përgjithshëm të Forcave të Armatosura dhe daljen në lirim, Gjeneral Brigade Sandër Ndue Lleshi. Dekretoj: Neni 1 Gjeneral Brigade Sandër Ndue Lleshi, lirohet nga detyra e zëvendësshef i Shtabit të Përgjithshëm të Forcave të Armatosura dhe del në lirim", thuhet në dekretin nr. 8189, i firmosur nga ish- Presidenti Bujar Nishani. Por pas këtij vendimi, Sandër Lleshi ka ankimuar dekretin dhe urdhrin e Ministrit të Mbrojtjes, Arben Imami, në Gjykatën e Tiranës. Gjykata e Rrethit të Tiranës ka vendosur 8 muaj më vonë të pranojë ankesën e Sandër Lleshit, si dhe ka vendosur të shfuqizojë dekretin e Presidentit Nishani dhe urdhrin e ministrit Imami. Në vendim thuhet se Sandër Lleshi duhet të paguhej nga Ministria e Mbrojtjes për 8 muajt që u nxor në lirim, si dhe ky shpërblim financiar do t'i jepej deri sa ai të sistemohet në një pozicion si ai që mbante. Por Sandër Lleshi nuk u kthye më në detyrën që mbante, për rrjedhojë ai është paguar edhe për këtë funksion që nuk e ka ushtruar. Gjykata e Rrethit Gjyqësor Tiranë me vendimin nr. 12606 datë 17.12.2013, vendosi: Pranimin e kërkesëpadisë. Anulimin e dekretit nr. 8189 dt. 21. 05. 2013 të Presidentit të Republikës së Shqipërisë. Anulimin e urdhrit nr. 1093 dt. 27.05.2013 të ministrit të Mbrojtjes së Republikës së Shqipërisë. Detyrimin e palës së paditur, Ministria e Mbrojtjes, t'i paguajë paditësit Sandër Lleshi pagën nga data 27. 05. 2013 deri në ditën e sistemimit të paditësit në një detyrë në përputhje me gradën që mban. Shpenzimet gjyqësore në ngarkim të palës së paditur Ministria e Mbrojtjes"", thuhet në vendimin e Gjykatës.