Ligji i ri për statusin e dëshmorit, mbeten në fuqi vendimet e komunizmit
"Të gjitha dekretet/ vendimet e organeve shtetërore për shpalljen dëshmor nuk janë objekt rishikimi"
Qeveria ka paraqitur në Kuvend projektligjin e ri "Për statusin e dëshmorit të atdheut".
Sipas këtij projektligji, parashikohet zgjerimi i institucioneve shtetërore që japin statusin e dëshmorit, por edhe shtimin e dokumentacionit për personat që kërkojnë të marrin këtë status.
PROJEKTLIGJI Në nenin 6 të projektligjit përcaktohen rastet e përjashtimit nga statusi i dëshmorit. Sipas këtij neni, thuhet se: "Statusin ' Dëshmor i Atdheut' nuk e përfitojnë personat, të cilët janë dënuar me vendime gjykate të formës së prerë për krime kundër njerëzimit, bashkëpunim me pushtuesit e vendit, veprimtari terroriste dhe agjenturore kundër interesave të Shqipërisë, vrasje me dashje, pas datës 9 maj 1945". Neni 7 i këtij projektligji është ai që pritet të ndezë debatin politik në vend dhe jo vetëm. Sipas këtij neni theksohet se: "Të gjitha dekretet/ vendimet e organeve shtetërore për shpalljen "Dëshmor", të marra para hyrjes në fuqi të këtij ligji, nuk janë objekt rishikimi nga ky ligj". Kësisoj, të gjithë personave që kanë marrë këtë status përpara hyrjes në fuqi të këtij ligji, nuk u hiqet statusi. Te këto vendime futen edhe personat që kanë qenë në pozicione drejtuese përgjatë diktaturës komuniste në Shqipëri, pasi çdo vendim për dhënie statusi dëshmori gjatë kësaj periudhe nuk do të shfuqizohet. Krahas kësaj, do e përfitojnë edhe figura të diktaturës që kanë qenë pjesë e Luftës Antifashiste Nacionalçlirimtare, ku pas kësaj kanë mbajtur pozicione të larta në shtetin diktatorial shqiptar.
DEBATI Projektligji pritet që të ngrejë debatin politik në vend edhe te lista e përfituesve të këtij statusi, kryesisht për personat që kanë marrë pjesë në Luftën Antifashiste Nacionalçlirimtare. Sipas projektligjit, thuhet se këtë status e përfitojnë: Shtetasit shqiptarë, të cilët kanë marrë pjesë me armë në dorë ose në formë të organizuar në Luftën Antifashiste Nacionalçlirimtare dhe kanë rënë duke luftuar kundër pushtuesve nazifashistë e bashkëpunëtorëve të tyre, nga data 7 prill 1939 deri më 9 maj 1945; Shtetasit shqiptarë të pushkatuar për pjesëmarrjen në formacionet luftarake të Luftës Antifashiste Nacionalçlirimtare apo për mbështetje të pjesëmarrësve të Frontit Antifashist Nacionalçlirimtar, si dhe të pushkatuar për hakmarrje nga pushtuesit nazifashistë apo bashkëpunëtorët e tyre nga data 7 prill 1939 deri më 9 maj 1945; Shtetasit shqiptarë, pjesëtarë të formacioneve ushtarake të Ushtrisë Nacionalçlirimtare, të cilët kanë rënë në luftën kundër pushtuesve nazifashistë jashtë kufijve shtetërorë deri më 9 maj 1945; Shtetasit e huaj, pjesëtarë të formacioneve të Ushtrisë Nacionalçlirimtare, që kanë rënë duke luftuar kundër pushtuesve nazifashistë; Shtetasit e huaj, pjesëtarë të formacioneve të ushtrive aleate në Luftën e Dytë Botërore, në ndihmë të Ushtrisë Nacionalçlirimtare shqiptare, të cilët kanë humbur jetën brenda territorit të Shqipërisë". Ky projektligj pritet të futet në procedurat parlamentare pas një muaji.