Gatuzo: Jemi për Champions, djemtë luajnë me qetësues

"Qortimi" për mesfushorin: Kesi është një... dhi

Ndeshjet me xhenovezët janë arkivuar me Milanin, i cili ka marrë maksimumin nga dy takimet e fundit.

Lidhur më këtë rikthim te fitoret, Gatuzo deklaroi: "Kam një organikë ku djemtë kalojnë mirë me njëri- tjetrin, madje edhe në momente negative. Kur e nisa punën e trajnerit, buzëqeshjet më acaronin, por tani e kuptoj se sa bukur është kur lojtarët gëzojnë bashkë. Shpresoj që goli i Romanjolit të ' fshijë' atë të Ikardit, gjithsesi ajo që më shqetëson më së shumti është mënyra sesi qëndrojmë në fushë. Shpesh dhurojmë hapësira e kjo nuk duhet të ndodhë".

PUNË - Deri përpara këtyre dy fitoreve, Rino ishte ndër më të kritikuarit te Milani, megjithatë trajneri nuk lëkundet dhe për mediat sqaron: "Mendoj se në karrierën si trajner kam pasur ulje- ngritjet e mia, por ka njerëz që më gjykojnë akoma në bazë të përvojës sime si futbollist. Gabime bëjmë të gjithë, por kam vepruar me zgjuarsi kur vendosa t'i përkushtohem profesionit tim aktual. Klasifikimi thotë që jemi të katërtit, por vazhdojmë të pësojmë shumë. Për momentin na duhen fitoret, më pas do të shohim zgjidhjet në mbrojtje".

SKEMAT - "Ishte një zgjedhje për të kapërcyer problemin e dëmtimeve. Abate nuk ishte mirë, e po ashtu Çalhanoglu e Kesi. Bakajoko nuk është i qetë, por sot e pashë më mirë se herët e tjera. I duhet edhe pak qetësi, por ndaj Xhenoas luajti mirë, duke thyer aksione e duke treguar ritëm të mirë. I mungon pak siguri, por do të gjejë vetveten shpejt. Me integrimin e Kontit. do të kemi edhe ndonjë variant taktik më shumë. Andrea po stërvitet fort, madje në "Milanello" ka pësuar edhe disa goditje të rënda. Kam mbyllur sytë gjithmonë sepse e kam ende në kokë dëmtimin e vjetshëm".

KESI... DHIA - Humori në nivele të larta lejon Gatuzon që në zonën miks ta quajë ' dhi' Frenk Kesin, sepse ndaj Xhenoas nuk shfrytëzoi të gjitha hapësirat. Mesfushori e sheh shtrembër dhe gazetarët e pranishëm ia vënë në dukje, me trajnerin që përpara se të largohet përgjigjet: "Me Kesin mund t'i lejoj këto batuta dhe më shumë madje".