Rama, sms deputetëve: Politika është shah, u dalim zot njerëzve
Maxhoranca me “plan B”, skema si Lleshi do drejtojë Ministrinë pa qenë ministër
Kryeministri Edi Rama i ka kërkuar Grupit të tij Parlamentar të heshtë dhe të mos bëjë asnjë koment për vendimin e Presidentit Meta për të mos dekretuar Sandër Lleshin si ministër të Brendshëm.
Kërkesa e kreut të qeverisë mbërriti në telefonat e deputetëve socialistë mbrëmjen e së shtunës, menjëherë pasi Presidenca njoftoi se Meta nuk krijoi bindjen e plotë për t’i dhënë besimin kandidaturës së Sandër Lleshin. Në mesazhin e tij, Rama u kujtonte deputetëve të tij se janë shumicë parlamentare dhe do t’u dalin zot njerëzve, vendit dhe Kushtetutës, por këtë gjë do ta bëjnë me maturi. Mesazhi më domethënës në tekstin e shkruar nga Kryeministri për deputetët e PS- së ishte kujtesa që i bënte gjithsecilit se politika është si një lojë shahu, duke kërkuar kohë për të ndërmarrë një lëvizje të matur. “Lutem asnjë lloj komenti askujt për vendimin e Presidentit! Ne jemi shumica dhe ne kemi detyrën t’u dalim zot njerëzve, vendit, Kushtetutës me maturi dhe vendosmëri. Politika është shah, mos e harroni”, thuhej në mesazhin e Ramës drejtuar deputetëve të PS- së.
“PLANI B” Kujtesa se politika është e ngjashme me një lojë shahu, më shumë sesa një mesazh për deputetët e PS- së duket se ka qenë paralajmërimi i lëvizjes së radhës që Rama do të bëjë në raport me vendimin e Metës. Burime të besueshme brenda maxhorancës sqarojnë se shumica ka qenë e përgatitur edhe për një skenar të tillë të Presidentit, ndaj edhe kishte një “plan B”. Të njëjtat burime sqarojnë për “Panorama” se Kryeministri nuk do të propozojë një kandidaturë të re, për të zëvendësuar Fatmir Xhafajn, pas mosdekretimit të Lleshit si ministër nga Presidenti. Kryeministri do t’i qëndrojë propozimit për të qenë pikërisht Sandër Lleshi në krye të Ministrisë së Brendshme, duke e emëruar këtë të fundit si zv. ministër dhe duke mos dërguar asnjë emër në Presidencë për drejtimin e Ministrisë së Brendshme. Në këtë mënyrë, Sandër Lleshi do të jetë zv. ministër i Punëve të Brendshme, por me atribute për të drejtuar këtë dikaster shumë të rëndësishëm. Për realizimin e këtij skenari, shumica i ka të gjitha ‘ gurët e shahut’ në du- art e saj. Fillimisht do të duhet mbledhja e Këshillit të Ministrave për të bërë emërimin e Sandër Lleshit si zv. ministër. Më pas do të duhet që përmes një shkrese, ministri i dorëhequr Fatmir Xhafaj të delegojë të gjithë kompetencat e tij te zv. ministri i Brendshëm, Sandër Lleshi, dhe më pas kryeparlamentari do të du- het të thërresë Parlamentin për të miratuar dekretin e Presidentit për shkarkimin e Fatmir Xhafajt si ministër.