Rama konfirmon Lleshin në Ministrinë e Brendshme, Meta: Pse e refuzova, iku koha e Sekretarëve të Parë
KRYEMINISTRI AKUZON PRESIDENTIN PER SHKELJEN E KUSHTETUTES NE GRUPIN E PS. KREU I SHTETIT: JAP SHPJEGIME NE PARLAMENT
Kryeministri Rama ka informuar deputetët e Grupit Parlamentar Socialist se pas mosdekretimit të Sandër Lleshit në krye të Ministrisë së Brendshme nga Presidenti Meta, ai do ta emërojë atë zv. ministër.
Duke zbardhur disa detaje nga takimi që zhvilloi ditën e diel me Presidentin e Republikës, Kryeministri Rama u shpreh se nuk ka marrë argumente kushtetuese për kandidaturën që i kishte dërguar kreut të shtetit. Mësohet se Kryeministri Rama u ka treguar deputetëve se Presidenti kishte kërkuar që kandidati të ishte figurë më politike dhe jo ushtarak me gradë, siç është Sandër Lleshi. “Presidenti Ilir Meta nuk ka dhënë asnjë arsye, por vetëm mosbindjen e tij për dekretimin e Sandër Lleshit si ministër i Brendshëm. Mosdekretimi është në shkelje të Kushtetutës”, mësohet të jetë shprehur Rama para deputetëve. Mësohet se që në fillim të fjalës së tij ai ka falënderuar të gjithë deputetët që respektuan mesazhin e tij për të mos interpretuar qëndrimin e Presidentit për kandidaturën e Sandër Lleshit. “Lutem, asnjë lloj komenti askujt për vendimin e Presidentit! Ne jemi shumica dhe ne kemi detyrën t’u dalim zot njerëzve, vendit, Kushtetutës me maturi dhe vendosmëri. Politika është shah, mos e harroni”, ishte mesazhi që Rama u dërgoi menjëherë deputetëve të tij ditën e shtunë, sapo Presidenti Meta, përmes zëdhënësit të tij, njoftoi në mënyrë telegrafike se, “Presidenti Ilir Meta nuk ka krijuar bindjen e plotë për t’i dhënë besimin kandidaturës së Sandër Lleshit si ministër i Bren- dshëm”. Në këtë kontekst, kreu i qeverisë u kujtoi deputetëve që të qëndrojnë në të njëjtën linjë dhe të mos përfshihen në një debat që nuk po e prodhojnë ata vetë. “Nuk kemi Gjykatë Kushtetuese dhe ne do gjejmë mënyra të tjera. Ne nuk duhet të biem në këtë situatë që nuk është e jona. Ne duhet t’i dalim për zot situatës. Derisa të bindim Presidentin që është Sandër Lleshi i duhuri. Nuk ka asnjë lloj mëdyshje për mbështetjen e Lleshit, i cili ka Top- Cosmic, certifikata më e lartë e sigurisë nga NATO”, mësohet të ketë thënë Rama. Në përfundim të mbledhjes së grupit, Rama zyrtarizoi vendimin e tij me një postim në “Twitter”: “Dakordësi e plotë në Grupin Parlamentar. Kuvendi do të miratojë nesër dekretin e Presidentit për shkarkimin e ish- ministrit të Brendshëm. Sandër Lleshi do të marrë drejtimin e MB si zëvendësministër. Por nuk mbaron me kaq. Për më shumë do t’i drejtohem Kuvendit, nesër në 10: 00". Gjatë mbledhjes së djeshme të Grupit Parlamentar Socialist, kryetari i tij, Taulant Balla, ka informuar deputetët se sot do të mblidhet Parlamenti në orën 10: 00 me një pikë në rendin e ditës, miratimin e dekretit të Presidentit për shkarkimin e ish- ministrit Fatmir Xhafaj. Balla u ka kërkuar deputetëve që të jenë të gjithë prezentë në votim, ndërsa u ka kërkuar që të jenë aktivë në komisionet parlamentare tani që ka nisur dhe diskutimi për projektbuxhetin e vitit 2019.