Xhafaj: Audio- përgjimi, orkestrim edhe i disa agjencive vendase
Ministri i Brendshëm i dorëhequr, Fatmir Xhafaj, zhvilloi dje një takim përshëndetës me drejtues të lartë të Ministrisë dhe Policisë së Shtetit, të cilët i ka falënderuar për punën e bërë gjatë periudhës që ai ka qenë në krye të Ministrisë. Gjatë fjalës së tij, ai ka renditur një sërë suksesesh të shënuara nga Policia e Shtetit gjatë drejtimit të tij, siç ishte heqja e Shqipërisë nga harta e vendeve të kultivimit të kanabisit. Apo edhe “beteja” e fituar me azilkërkuesit, që tashmë mund të konsiderohet, sipas tij, një histori suksesi. Ndërsa nuk la pa përmendur edhe shantazhin, siç e cilësoi ai, historinë e audio- përgjimit të të vëllait, që, sipas Xhafajt, ishte një orkestrim edhe nga disa agjenci vendase ligjzbatuese. “Natyra dhe edukimi im familjar, eksperienca ime politike dhe ajo jetësore më ka bërë që deri në fund të qëndroj në respekt të ligjit dhe të jem sa më institucional dhe i përgjegjshëm në gjithë konfliktin politik, që opozita krijoi me mua dhe për mua. Duke përfshirë këtu edhe manipulimin komplet kriminal të bërë në çështjen e audio- përgjimit me një qëllim final: shantazhin ndaj meje në funksionin e ministrit. E, për fat të keq, në këtë orkestrim duket se janë përfshirë edhe segmente të disa agjencive ligjzbatuese vendase. Dua të nënvizoj edhe faktin se ky sulm jo vetëm ka në themel diletantizmin politik të opozitës, por ai edhe për këtë shkak, ka pas tij interesat e botës së krimit”, u shpreh dje Xhafaj. Ndërsa më përpara bëri edhe një bilanc të punës së Policisë së Shtetit në 9 muaj. “Numri i veprave penale dhe në tërësi treguesit e nivelit të kriminalitetit gjatë vitit të kaluar, por dhe gjatë këtij 9- mujori janë në nivelet më të ulëta historike. Përfshi këtu edhe numrin e vrasjeve, vjedhjeve, aksidenteve, etj.. Në një dallim të madh nga e shkuara e afërt dhe e largët për vepra të rënda penale, si vrasje apo grabitje, jo vetëm janë zbuluar në kohë autorët e tyre, por çfarë është më e rëndësishme është bërë ndalimi dhe/ ose arrestimi i tyre”, tha Xhafaj. Fatmir Xhafaj, gjatë fjalës së tij, solli në kujtesë faktin se në korrik të vitit të kaluar, para se të merrte detyrën si ministër, vendi ishte nën presionin e shprehur të kthimit të regjimit të vizave për shkak të rritjes së jashtëzakonshme të numrit të azilantëve në Francë, Holandë, Belgjikë, etj.. “Kjo u shndërrua në një prioritet kyç të punës sonë edhe në kuadrin e plotësimit të kushteve të procesit të integrimit, por edhe si një test i rëndësishëm ndërkombëtar. Me një punë të mirëorganizuar, ne mundëm që brenda 12 muajve t’i kthejmë shifrat e azilkërkimit nga një histori dështimi në një histori suksesi. Një histori suksesi, që nga vetë Franca skeptike deri para pak kohësh, sot kjo histori suksesi po kërkohet të prezantohet si një model në Europë”, u shpreh Xhafaj.