PD: U emërua figura më e papërshtatshme, Rama do jetë ministër i Brendshëm
Partia Demokratike akuzon Kryeministrin Edi Rama se kërkon me çdo kusht të vendosë Sandër Lleshin në krye të Ministrisë së Brendshme që të ketë kontrollin e plotë të këtij institucioni. Përmes një reagimi për mediat, menjëherë pasi socialistët vendosën të emërojnë zv. ministër me kompetenca të plota për drejtimin e Ministrisë së Brendshme, Sandër Lleshin, PD- ja kujtoi se lëvizja e Ramës bëhej për të mbrojtur Ballën, Dakon, Gjiknurin dhe vetë Olsi Ramën. “Këmbëngulja e Edi Ramës për emërimin e Sandër Lleshit në drejtimin e Ministrisë së Brendshme konfirmon qëndrimin e opozitës se Rama e ka jetike kontrollin e plotë të Ministrisë së Brendshme. Duke qenë vetë de facto ministër i Brendshëm, Edi Rama ka më shumë mjete për të mbrojtur Olsi Ramën, Vangjush Dakon, Taulant Ballën, Damian Gjiknurin, Arben Ahmetajn dhe këdo tjetër anëtar të bandës së tij në pushtet”, thuhet në reagimin zyrtar të PD- së. Selia blu e konsideron gjeneralin Sandër Lleshi si të papërshtatshëm për të marrë detyrën e ministrit të Brendshëm. “Emërimi i figurës më të papërshtatshme për të drejtuar Ministrinë e Brendshme provon që Edi Ramës nuk i intereson lufta kundër krimit të organizuar, por mbrojtja e tij me çdo çmim. Është fakt që deri më sot asnjë emërtesë e Edi Ramës në krye të Ministrisë së Brendshme nuk e ka luftuar krimin e organizuar, por ka bashkëpunuar dhe e ka mbrojtur atë me porosi direkte të Edi Ramës. Edi Rama nuk mund ta luftojë Edi Ramën, prandaj i duhet një kukull si Sandër Lleshi për të mbrojtur veten dhe për t’i siguruar paprekshmëri krimit”, sqaron në reagimin e saj zyrtar selia blu.