Meta propozon gjyqtaren Tusha për kryetare të KLSH
Presidenti: Kandidatja me integritet të lartë, doli e pastër nga vetingu
Presidenti Meta përzgjodhi Vitore Tushën si kandidate për kryetare të Kontrollit të Lartë të Shtetit.
Pak orë pasi zhvilloi takimin me kryetarin e Kuvendit, Gramoz Ruçi, Meta ka bërë publik vendimin e tij për t’i propozuar Kuvendit anëtaren e Gjykatës Kushtetuese si pasuese të Bujar Leskajt. Në argumentimin e tij mbi këtë vendimmarrje, Presidenti Meta shprehet se gjyqtarja Tusha ka kaluar me sukses procesin e vetingut. “Vitore Tusha, aktualisht anëtare në detyrë e Gjykatës Kushtetuese, së cilës i ka mbaruar mandati në këtë funksion që prej datës 10 mars 2017, gëzon një integritet të lartë moral dhe profesional, e konfirmuar edhe në rrugë institucionale, pasi si subjekt i ligjit nr. 84/ 2016, ajo është konfirmuar në detyrë dhe ka kaluar me sukses dhe me vendim të formës së prerë, procesin e rivlerësimit kalimtar ( vetingun), për të gjithë komponentët e këtij procesi, duke krijuar bindjen se kandidatura e saj është e denjë për t’u zgjedhur si kryetar i Kontrollit ë Lartë të Shtetit”, theksohet në argumentimin e Presidentit. GJYKATA Nëse propozimi i Presidentit do të miratohet nga Parlamenti, do të krijohet edhe një vakancë më shumë në Gjykatën Kushtetuese. Sipas ligjit të funksionimit të Gjykatës Kushtetuese, Vitore Tusha, pavarësisht se i ka mbaruar mandati, vijon të qëndrojë në detyrë deri në zëvendësimin e saj. Në kushtet aktuale kur KED nuk është ngritur, Tusha gëzon mandatin e anëtares së Gjykatës. Por kalimi i saj për në KLSH bën që Gjykata kryesore në vend të iki drejt shkrirjes totale, pasi do të ngelte vetëm me një anëtar, që është krye- tari i saj, Bashkim Dedja. Krahas Gjykatës Kushtetuese, Vitore Tusha është edhe anëtare- zëvendësuese në Këshillin e Emërimeve në Drejtësi, ku do të krijohej edhe një vakancë tjetër në këtë organ të krijuar pas Reformës në Drejtësi.
PROCEDURA Por a mund të zgjidhet Vitore Tusha si anëtare e KLSHsë? Këtë përgjigje e di vetëm maxhoranca. Sipas Rregullores së Kuvendit, neni 111 ku flitet për emërimin e anëtarëve dhe kryetarëve të institucioneve kushtetuese, theksohet se një kandidaturë duhet të marrë pëlqimin e së paku 28 deputetëve për të kaluar më pas për votim në seancë plenare. Në një kohë kur opozita është bë bojkot parlamentar pa afat, praktikisht vendimi për emërimin e Vitore Tushës apo kthimin mbrapsht të propozimit të Presidentit e ka vetë maxhoranca me Kryeministrin Rama në krye. Vendimi i Presidentit erdhi pak orë, pasi ai kishte zhvilluar një takim me kryetarin e Kuvendit, Gramoz Ruçi, ku pjesë e diskutimit të tyre ishte edhe çështja e zgjedhjes së kryetarit të ri të Kontrollit të Lartë të Shtetit. Tani pritet që kandidatura e Vitore Tushës të kalojë për shqyrtim në procedurat parlamentare.