Fuga: Platforma ime reformon Akademinë, tjetra e kalbëzon

“Projektligji i hartuar nga grupi i punës së Ministrisë së Arsimit dhe Akademia nuk sjell reformim, e kalbëzon edhe më rëndë Akademinë e Shkencave”, kështu u shpreh dje akademiku Artan Fuga, pasi doli nga mbledhja me dyer të mbyllura dhe ku mësohet të jetë diskutuar me tone të larta. Sipas tij, platforma e grupit të punës “është një riprodhim dhe vjen si pasojë e faktit që nuk ka koncepte të reja, nuk ka një model të ri, nuk gjen pozicionimin e Akademisë në sistemin e kërkimit shkencor. Është një model që nuk funksionon dhe do ta degradojë edhe më keq Akademinë. Nga ana tjetër, unë jam shumë i hapur, në vazhdim të idesë së Kryeministrit për gjithëpërfshirje dhe ballafaqimin e të dy platformave”. Akademiku Fuga u shpreh se Asambleja, pavarësisht se nuk e pranon, është tërhequr dhe pasi ka bërë gjithë censurimin e mundshëm të platformës së tij, ka kërkuar ballafaqim si pretendonte ai. Por Fuga shpjegon se dje ai nuk ka qenë i përgatitur dhe ka kërkuar disa ditë kohë. “Sipas kryetarit të grupit të punës, z. Skënder Gjinushi, këto dy platforma nuk kanë ndonjë dallim të madh dhe janë të integrueshme, kurse mendimi im është që ato platforma janë dy modele diametralisht të kundërt. Dy modele që japin dy forma dhe përmbajtje të ndryshme të Akademisë”, tha Fuga, duke shtuar se është i hapur për diskutime nen për nen. “Por kjo mund të bëhet në praninë e znj. ministre, e cila sipas deklaratave, pranon të na presë në zyrë e të bëjmë debatimin. Kjo çështje nuk zgjidhet me votë, por përpara një jurie të madhe, e cila të përbëhet nga komuniteti i shkencëtarëve, universitarëve, profesorëve të vendit, të cilët duhet të diskutojnë, se cilat nga platformat u duket më e përshtatshme. Ju them me përgjegjësi që znj. ministre më ka konfirmuar që dalja e debatit jashtë Akademisë është më e mira që mund të bëhet. Unë i qëndroj mendimit që platforma ime i jep një mundësi të plotë reformimit të Akademisë, kurse reforma tjetër është ndërtuar thjesht mbi bazën e dëshirave dhe interesave të vogla dhe nuk sjell asnjë ndryshim, por është një fasadë, e cila do ta degradojë edhe më keq Akademinë e Shkencave dhe nuk do të mund të kryejë funksionin e vet, si ka bërë deri më tani”, tha dje Fuga.