LISTA E ALUIZNI
Legalizimet, 1280 familjet që marrin tapitë në Tiranë
ALUIZNI publikon listën e familjeve që kanë gati tapinë në Tiranë. Përfitues për shtëpitë e shtesat pa leje. Dokumentet që duhen
Drejtoria e ALUIZNI- t ka publikuar listën e familjeve që kanë gati lejen e legalizimit. Gazeta boton sot emrat e 1280 përfituesve, prej të cilëve 1220 pajisen me leje për objektin, ndërsa 60 prej tyre marrin lejen për shtesën.
Qytetarët që kanë emrin në listë duhet të paraqiten në sportelet e agjencisë, përkatësisht në zyrat e Tiranë Veri dhe Tirana 2 për të tërhequr tapinë.
NDRYSHIMET LIGJORE Duke nisur nga janari i vitit që vjen, do të nisë funksionimin edhe Agjencia Shtetërore e Kadastrës. Ky institucion do të ketë në ngarkim të gjitha çështjet e pronësisë, përfshirë këtu edhe legalizimet. Në draftin e përgatitur nga ALUIZNI, "Për përfundimin e proceseve kalimtare të pronësisë" ka një kapitull të posaçëm, në të cilin përcaktohen edhe kriteret e reja që do të aplikohen për kualifikimin e objekteve pa leje, afatet dhe dokumentacionin e nevojshëm që kërkohet. Sipas projektligjit, Agjencia Shtetërore e Kadastrës ka detyrimin që brenda dy muajve të përfundojë procedurat e legalizimit dhe të pajisë familjet me leje. Nga ana tjetër, ata të cilët duan ta mbyllin sa më shpejt këtë process, kanë mundësi ta bëjnë këtë duke paguar një faturë shtesë. "ASHK, brenda 60 ditëve nga përfundimi i procedurave të kualifikimit, legalizon ndërtimin, duke respektuar dispozitat e legjislacionit në fuqi për regjimet pasurore martesore. Poseduesi i ndërtimit pa leje ka të drejtë të kërkojë kryerjen e procedurave të legalizimit brenda 30 ditëve, kundrejt pagesës së një tarife shërbimi shtesë", thuhet në nenin 16 të draftit.
DOKUMENTET Sa i takon dokumentacionit që duhet dorëzuar, në listën e kërkesave do të përfshihen: gen- plani i ndërtimit, planimetria e çdo kati të ndërtimit dhe sipërfaqet në m dhe akt- ekspertiza për qëndrueshmërinë konstruktive të objektit, për ndërtimet me lartësi mbi 4 kate. Krahas tyre janë përcaktuar edhe kushtet që kërkohen për të mos u përjashtuar nga procesi. Kështu, duhet që objekti të mos cënojë veprat kryesore të infrastrukturës publike, akset rrugore si edhe monumentet e kulturës. Një distancë e caktuar do të respketohet edhe përgjatë vijës bregdetare, çka do të thotë se jo të gjitha ndërtimet në bregdet do të legalizohen. Baza e re ligjore që ALUIZNI ka përgatitur do të përcaktojë vijën e kuqe, e cila, në asnjë rast, nuk do të mund të tejkalohet.