Kuvendi ndalon ' vetingun në politikë', PD nis takimet

Salianji: Zgjedhjet në dorë të krimit, Rama ka bërë marrëveshje

Panorama (Albania) - - POLITIKE -

Kuvendi i Shqipërisë ka vendosur të ndërpresë seancat dëgjimore për nismën kushtetuese të PD- së për vetingun në politikë. Përmes një e- maili, Kuvendi ka informuar anëtarët e Komisionit të Ligjeve dhe përfaqësuesit e Këshillit të Legjislacionit se mbledhjet konsultuese për këtë nismë kushtetuese do të ndërpriten. Sipas Kuvendit, grupet e interesit kanë kërkuar që të pritet përgjigja nga Komisioni i Venecias e më pas të vijohet me mbledhjet në Kuvend për nismën e ndryshimit të Kushtetutës për vetingun në politikë. Por pavarësisht kësaj vendimmarrjeje të Kuvendit, deputetët e PD- së kanë nisur takimet me pedagogë dhe studentë për të shpjeguar arsyet e domosdoshmërisë së vetingut të politikës. Deputetët e PD- së, Oerd Bylykbashi, Ervin Salianji, Izmira Ulqinaku dhe këshilltari ligjor i PD- së, Gazment Bardhi, kanë zhvilluar në Shkodër me pedagogë dhe studentë një leksion të hapur për platformën e PD- së për vetingun në politikë dhe çlirimin e ekonomisë nga krimi, oligarkia dhe korrupsioni. Nënkryetari i Grupit të PD- së, Oerd Bylykbashi, cilësoi si të domosdoshme dekriminalizimin e zgjedhjeve përmes vetingut në politikë. "Grupi Parlamentar i Partisë Demokratike ka bërë propozim zyrtar në Parlament për amendamente kushtetuese për heqjen e zyrtarëve të lartë që mund të jenë deputetë apo ministra, apo zyrtarë në institucione shtetërore, që kanë lidhje me krimin, si një fazë tjetër e dekriminalizimit", tha ai. Deputeti Ervin Salianji vuri në dukje se zgjedhjet janë në dorë të krimit, sepse Edi Rama ka bërë marrëveshje me krimin. "Kryebashkiaku i Durrësit që është sa një akullore, përse merr vota, përse fiton? Merr vota sepse në çdo cep të territorit të vet mbledh vota si menaxher i interesave të krimit. Prandaj ne kërkojmë veting. Në Lezhë, me Ndokat janë blerë vota. Në Kavajë, Edi Rama mbronte prej kohësh një akullore tjetër. Në Elbasan, Taulant Balla, përveçse bredh me trafikantë droge, u jep paratë e shqiptarëve në konkurrencë të pandershme, banditëve si Sanxhakët dhe Çelajt. Në Tiranë, me Sajmir Tahirin dhe Shullazin, në Vlorë me Habilajt, Xhafajt, Damian Gjiknurin dhe me Ramën, që janë thjesht mbrojtës të interesave të krimit?", tha Salianji. Gazment Bardhi u fokusua te papërgjegjshmëria e qeverisë me paratë e buxhetit të shtetit dhe nevojën urgjente për pastrimin e ekonomisë nga oligarkia dhe korrupsioni, përmes ndryshimeve në Ligjin Antimafia.

Deputetët e PD, gjatë takimit në Shkodër

Newspapers in Albanian

Newspapers from Albania

© PressReader. All rights reserved.