Policia Rrugore: Mos fluturoni, zbatoni rregullat

Policia Rrugore e Tiranës, pas disa kontrolleve të organizuara përgjatë javës dhe fundjavës me objekt përparësitë ndaj këmbësorëve, verifikimin e nivelit të alkoolit te drejtuesit e autobusëve, shpejtësia mbi normat e lejuara, kanë vijuar masat edhe gjatë natës, duke u gdhirë dita e djeshme. Rrugorët e kryeqytetit, krahas masave për menaxhimin e rrymave të trafikut, organizuan pika kontrolli me objekt monitorimin e sjelljes së përdoruesve të rrugës sipas sinjalizimit rrugor vertikal dhe horizontal në disa kryqëzime të kryeqytetit. Nga kontrollet e ushtruara janë konstatuar dhe janë gjobitur: 36 drejtues mjetesh, të cilët u konstatuan duke qarkulluar në kundërshtim me sinjalizimin rrugor vertikal; 17 drejtues mjetesh për përdorim celulari gjatë drejtimit të mjeteve; 21 drejtues motomjetesh për mospërdorim të kaskës mbrojtëse; 16 drejtues mjetesh për mosdhënie përparësi ndaj këmbësorëve; 236 drejtues për të tjera shkelje të rregullave të qarkullimit rrugor. "Fundjava është akoma me e bukur kur respekton rregullat", këshillon Policia. Nga ana tjetër, Policia Rrugore e Tiranës ka vijuar kontrollet me radar në rrugën interurbane Tiranë - Durrës, për parandalimin e aksidenteve. Prej orës 20: 00 të mbrëmjes së të premtes e deri në orën 02: 00 të mëngjesit të djeshëm, janë konstatuar 21 raste të tejkalimit të shpejtësisë deri në 2fish mbi normën e lejuar. Shpejtësi që varionin nga 150 km/ h deri në 176 km/ h, duke u kthyer në rrezik potencial për sigurinë e jetës. Policia Rrugore e kryeqytetit thotë se do vijojë kontrollet përgjatë fundjavës, me shërbime të shtuara, duke përdorur radarin e dragerat, me qëllimin e vetëm sigurinë e jetës në rrugë. "Mos fluturoni, por zbatoni rregullat e qarkullimit rrugor, se në rastin më të mirë ju pret gjoba e në rastin më të keq ambulanca dhe destinacioni për në shtëpi është në pikëpyetje", shprehet Policia në një tjetër këshillë për drejtuesit e mjeteve.