Kryemadhi: BE dështoi në strategjinë për Shqipërinë
“Rilindja e ka kthyer Parlamentin në shërbim të bandave”
Kryetarja e LSI- së, Monika Kryemadhi, ka kritikuar dje qëndrimin e mbajtur nga Brukseli për Shqipërinë.
Në një deklaratë për mediat, Kryemadhi e ka cilësuar si të papranueshme thirrjen e Komisionerit për Zgjerimin e BE- së, Johannes Hahn, që opozita të thyejë bojkotin dhe të rikthehet në Kuvend. “Mendoj që Brukseli ka gabuar jashtëzakonisht shumë më strategjinë që ka ndjekur ndaj Shqipërisë. Ne kemi një vend, i cili aspiron dhe dëshiron pafundësisht për të qenë pjesë e Bashkimit Europian. Edhe pse është pjesë e Europës, nuk është pjesë e një strukture burokratike të themi apo dhe institucionale siç është Bashkimi Europian, është aspirata e shqiptarëve, por kjo strukturë nuk ka të bëjë me dëshirat individuale të secilit prej nesh. Kjo strukturë tashmë dhe përfshirja e Shqipërisë në BE ka të bëjë me të ardhmen e shqiptarëve. Nuk mund të flasim për të mbyllur bojkotin e opozitës, sepse nuk e ka bojkotuar opozita Parlamentin, e ka bojkotuar Rilindja Parlamentin, të cilin e ka kthyer në një institucion në shërbim të bandave. Ajo çka të bën më shumë përshtypje dhe që ndihesh me të vërtetë shumë e indinjuar për shkak të naivitetit që vjen ndonjëherë nga institucionet ndërkombëtare, do të dëshiroja të ishte thjesht një naivitet politik, sesa do të dëshiroja të ishte e vërtetë e që mund të ishte një naivitet i stimuluar nga qeverisja shqiptare”, tha Kryemadhi.
Në deklaratën e saj, kryetarja e LSI- së u pyet për qëndrimin e partisë së saj për afatin që ka opozita para se t’i digjen mandatet e deputetëve. Në përgjigje të saj, ajo u shpreh se: “E para, mua nuk më duket problemi kryesor sot çështja e mandateve të deputetëve, sepse Shqipëria dhe politika shqiptare ka probleme shumë më të mëdha. Mendoj sot se problemi më i madh për shqiptarët është varfëria, papunësia. Mendoj që problemi më i madh është mungesa e shpresës e brezit të ri, të cilët çdo ditë e më shumë po largohen nga Shqipëria. Ndiej një kënaqësi shumë të madhe kur shikoj gjithë këta fëmijë që vijnë të organizuar nga shkollat për të marrë pjesë në Panairin e Librit, që është një kulturë që duhet ta stimulojmë shumë më shumë”.