Gruevski u arratis nga Hani i Hotit me diplomatë hungarezë
Doli nga “Hani i Hotit” drejt Malit të Zi me kartë identiteti dhe makinë diplomatike hungareze, nuk ishte në kërkim
Arratia e ish- Kryeministrit maqedonas, Nikola Gruevski, ka përfshirë edhe Shqipërinë, pasi u konfirmua zyrtarisht se ai ka dalë nga pika doganore “Hani i Hotit”, i identifikuar me një kartë identiteti, i shoqëruar me diplomatë hungarezë ( shoferin dhe një zyrtar të ambasadës me pasaporta diplomatike), me një makinë diplomatike hungareze.
Policia shqiptare ka konfirmuar se Gruevski ka dalë nga territori i Shqipërisë të dielën, më datë 11 nëntor, rreth orës 19: 11 në drejtim të Malit të Zi, si pasagjer në automjetin me targë CD1013A në pronësi të ambasadës hungareze në Tiranë. Largimi i tij kështu ka qenë shumë i thjeshtë, pasi bashkëpunëtori kryesor ka qenë vetë shteti, ku ai ka kërkuar azil politik. Nuk ka informacione se çfarë ka ndodhur pas kalimit në Malin e Zi dhe kjo mbetet çështje e autoriteteve malazeze, por zyrtarët hungarezë ende nuk kanë reaguar mbi përfshirjen në arratinë e Gruevskit. Kalimi nga Maqedonia në territorin shqiptar ende nuk dihet zyrtarisht se si ka ndodhur, por procedura sigurisht nuk ka qenë legale, për shkak se hyrja nuk rezulton e regjistruar. Shumë policë dhe disa zyrtarë maqedonas tani janë nën hetim nga Prokuroria, se kanë ndihmuar ish- Kryeministrin të arratiset. Autoritetet në vendin fqinj e po ashtu edhe në Shqipëri nuk përjashtojnë as ndonjë kalim në rrugë të gjelbër, pra, në këmbë dhe pa përfshirë kontroll doganor, nga Maqedonia drejt Shqipërisë, ku më pas besohet se e ka pritur një makinë diplomatike hungareze. Ish- Kryeministri maqedonas, i dënuar me dy vjet heqje lirie për korrupsion në vetëm një rast gjyqësor nga pesë procese që po shqyrtohen kundër tij, në kohën e kalimit në kufirin shqiptar nuk ka qenë në kërkim ndërkombëtar.
Deri të hënën, Policia maqedonase kishte vetëm urdhër arresti të brendshëm për ish- Kryeministrin. Policia shqiptare ka konfirmuar se njoftimi për shpalljen në kërkim ndërkombëtar për këtë shtetas është dërguar për Interpol Tirana nga Interpol Shkupi dy ditë më vonë, më datë 13.11.2018 rreth orës 19: 35. Urdhri ndërkombëtar u lëshua pasi vetë Gruevski konfirmoi nëpërmjet llogarisë së tij në “Facebook” se kishte mbërritur në Hungari dhe aty do të qëndronte, pasi po persekutohej politikisht në vendin e tij. Gruevski ka shkruar se ka marrë shumë kërcënime me jetë dhe kjo ishte një nga arsyet që ai u largua nga vendi. Nga partia e tij, VMRO- DPMNE, deri të mërkurën kanë deklaruar se nuk kishin dijeni se ku ishte ish- lideri i tyre. Të mërkurën Hungaria ka konfirmuar zyrtarisht se ka marrë një kërkesë për azil nga ish- Kryeministri maqedonas dhe se po e shqyrton atë.