Dorëhiqet zv. ministri Muka: S’bëhej reformë në MAS
“Në atë gjendje që është Ministria, ndryshimi që doja, s’realizohet”
Vetëm dy javë pas zotimit për të reformuar arsimin e lartë, dorëhiqet zv. ministri i Arsimit, Taulant Muka. Ende pa u shuar buja me të cilën erdhi në post, me po aq zhurmë po shoqërohet edhe largimi i tij. Në fakt, për ne, nuk ishte diçka e paralajmëruar. Në një intervistë për gazetën, ish- zv. ministri tashmë ( pasi i ka paraqitur dorëheqjen e parevokueshme ministrit të Arsimit) tregon për një pakt të bërë me Kryeministrin Edi Rama. “Unë nuk kam kompromis me askënd për qëllimin që dua të arrij. Në rast se mënyra se si unë e konceptoj reformën e sistemit arsimor në Shqipëri ka pengesa nga ato që mua më premtohen, unë iki”, ka thënë Muka për “Panoramën”. Mosrespektimi i tij, siç duket, bëri që i riu të mos e mendojë dy herë të heqë dorë. “Në atë gjendje ku është Ministria e Arsimit sot, reforma që unë doja të bëja dhe pasioni që kam për arsimin, nuk realizohet”, thotë Muka për gazetën, pa preferuar të japë asnjë detaj mbi shkëndijën që e bëri atë t’i thotë “lamtumirë” postit që e mbajti për vetëm 2 javë. “Për arsye etike, morale dhe profesionale dhe të papajtueshmërisë që unë kam me modelin e punës
së aplikuar në Ministrinë e Arsimit Sportit dhe Rinisë, ju paraqes dorëheqjen time të parevokueshme nga posti i zëvendësministrit të Arsimit Rinisë dhe Sportit”, shkruhet në kërkesën për dorëheqje drejtuar Kryeministrit Edi Rama e për dijeni dhe ministres Lindita Nikolla. Vendimi për t’u larguar duket se është marrë në kohë rekord, pasi vetëm pak orë më parë Muka ka marrë pjesë në ceremoninë e diplomimit të studentëve të Universitetit të Tiranës zhvilluar në Amfiteatrin e Liqenit Artificial. Jo më larg se një ditë para dorëheqjes shfaqet me një foto në rrjetet sociale ku tregon projektin aktual të tij. “Bashkë me çunat e Ministrisë do bëjmë rankimin e akademikëve shqiptarë sipas produktit shkencor për të evidentuar shkencëtarët shqiptarë që jetojnë në Shqipëri”. Kujtojmë që Muka ka në fuqi dy oferta të majme punësimi jashtë vendit.