Pollo: Brukseli nuk dha qëndrim pozitiv për Shqipërinë
Kryetari i Komisionit të Integrimit Europian, Genc Pollo, theksoi dje se Shqipëria nuk ka bërë progres në rrugën e integrimit. Në një qëndrim të tij për mediat, Pollo tha se qeveria nuk tha të vërtetën dhe se Shqipëria nuk ka bërë progres në miratimin e vendimeve që ndihmojnë në hapjen e negociatave për anëtarësim në qershor të vitit 2019. “Kush pretendon se dje në Bruksel, në Këshillin e Stabilizim Asociimit ( KSA), qeveria Rama mori lavdërimin e radhës nga Komisioni Europian, do të ketë dëgjuar vetëm intervistat e Bushatit, por nuk ka mundësi të ketë lexuar deklaratën e KSA, ku pala europiane u kryesua nga Përfaqësuesja e Lartë, Mogherini. Ndërkohë që në mbledhjen e para një viti, më 15 nëntor 2017, znj. Mogherini “mirëpriti hapa kundër krimit e korrupsionit e suksese kundër kanabisit”, në vijim të mbledhjes së djeshme, u tha se “BE ritheksoi nevojën kritike për të arritur rezultate të prekshme në luftën kundër korrupsionit në të gjitha nivelet dhe në luftën kundër krimit të organizuar, veçanërisht kundër kultivimit e trafikimit të narkotikëve”, u shpreh kryetari i Komisionit të Integrimit. Pollo bëri edhe një krahasim të qëndrimeve të Mogherinit në 2017 dhe ato të 2018, duke theksuar se situata e vendit në raport me Bashkimin Europian është përkeqësuar. “Kontrasti, sipas Mogherinit, duket qartë: Në 2017 mirëpresin hapat, në 2018 ritheksojnë nevojën kritike për rezultate të prekshme; Në 2017 flitet në përgjithësi për krim e korrupsion, në 2018 për korrupsion në të gjitha nivelet; Në 2017 flitet vetëm për kanabis, në 2018 flitet për ‘ drugs’, pra, narkotikë të tërë llojeve, përfshi kokainën. Edhe në këtë lagje të Brukselit, dashamirëse me ta, Rama e Bushati nuk ndërtojnë dot më Fasadën e Projektimit. Edhe kjo deklaratë tregon se qeveria rilindiste po bëhet gjithnjë e më shumë pengesë për hapjen e negociatave të anëtarësimit”, shprehet Pollo në qëndrimin e tij. Maxhoranca dhe opozita kanë vijuar debatin e radhës për sa u përket qëndrimeve të Brukselit për hapjen e negociatave në qershor të vitit 2019. Sipas opozitës, qeveria ka përkeqësuar situatën në raport me BE, ndërsa, sipas maxhorancës, opozita duhet të thyejë bojkoton dhe të kontribuojë në miratimin e reformave si ajo zgjedhore.