Ish- Presidenti Nishani: Shkodra, peng i krimit
Ish- Presidenti i Republikës, Bujar Nishani, mori pjesë në Shkodër në konferencën shkencore "Shkodra në vitet e komunizmit 1945- 1953", e organizuar nga Këshilli i Qarkut Shkodër. Në fillim të fjalës së tij, ish- kreu i shtetit deklaroi se për fatin e keq, Shkodra kohët e fundit po na paraqitet si qytet ku individë apo grupe të caktuara individësh s'kanë asnjë lidhje jo vetëm me traditën, por edhe me realitetin e qytetarisë dhe civilizimit, kulturës, emancipimit, zhvillimit dhe duket sikur e kanë marrë peng përkohësisht jetën e këtij qyteti, lirinë e këtij qyteti, të drejtat e qytetarëve dhe sigurinë e qytetit. Pas këtij takimi, duke folur për mediat, ish- Presidenti Nishani tha se fakti që vetëm para dy ditësh nga një vendim i Gjykatës së Krimeve të Rënda, që u dha në Tiranë kundër Shullazit, pati prononcime zyrtare të disa ambasadave kryesore në Shqipëri, si SHBA, Britani, BE, e një sërë institucionesh të tjera ndërkombëtare u angazhuan duke e vlerësuar si një hap të parë dhe kjo flet sa një mijë deklarata politike. "Fakti që faktori ndërkombëtar është kaq i shqetësuar sa bën deklarata për një grup kriminal, kjo mjafton. Kemi angazhim të strukturave kundër krimit në mbarë Europën, lidhur me kriminalitetin e organizuar në Shqipëri", tha Nishani. "Ne kemi këtë model që krimi jo vetëm nuk e ka më frikë shtetin, kur krimi jo vetëm që tallet me ligjin, por krimi është prodhuar për shkak të tolerimit të bashkëjetesës që politika dhe shteti kanë me të. Kemi një situatë që nuk ka qenë më herët në 25 vitet e fundit, me gjithë problematikat që ka pasur kurba e krimit. Ajo nuk ka trokitur më herët në dyert e politikës për ta sjellë atë në pushtet e më pas të vendosë", përfundoi ish- Presidenti Nishani.