Pensionet, skema e re për rritjen e përfitimit

Qeveria bën gati ndryshimet në ligjin për pensionet. Kategoritë që përfitojnë shtesë pensioni. Kush vijon punën, mund të marrë 2.4% më shumë

Shtesë me 2.4 për qind në vit për të gjithë ata të cilët mbushin moshën e pensionit, por vijojnë të qëndrojnë në marrëdhënie pune.

Pas shumë diskutimesh dhe opsionesh të parashtruara, qeveria duket se ka gjetur edhe zgjidhjen, të cilësuar për shumëkënd si e mesmja e artë. Kështu, të gjithë ata që kanë mbushur moshën për pension mundet njëherazi të punojnë dhe paralelisht me pensionin të marrin edhe rrogën mujore. Skema parashikon që në përfundim të punës, pra, në momentin e ndërprerjes së kontratës, masa e pensionit do të rritet me 0.20 për qind për çdo muaj punë, ose 2.4 për qind rritje në çdo vit pune. Praktikisht sa më shumë vite pune, aq më i lartë përfitimi në momentin që vendosni të ndërprisni kontratën. Një gjë e tillë është e përcaktuar në projektligjin “Për disa në ndryshime në projektligjin për sigurimet shoqërore”, i cili pritet të kalojë brenda këtij viti për miratim në qeveri. “Përfituesi i pen- sionit të pleqërisë, kur punësohet në sektorin privat paguan kontributet e sigurimeve shoqërore dhe njëkohësisht vazhdon të tërheqë këstin mujor të pensionit, merr shtesë mbi pension në masën 0.20 % të pensionit për çdo muaj që ka paguar kontribut. Kjo shtesë jepet me kërkesë të personit të interesuar dhe llogaritet e fillon të paguhet nga data kur ndërpritet punësimi ose veprimtaria ekonomike si punëdhënës apo i vetëpunësuar”, thuhet shprehimisht në draft.

SKEMA Deri më sot të gjithë ata që mbushnin moshën e pensionit kishin të drejtë ta përfitonin atë bashkë me rrogën mujore me kushtin që të paguanin sigurimet. Kontributet e paguara nuk kanë rivlerësuar masën e pension- it të përfituesit, por kanë shkuar si solidaritet, ndërkohë që gjithmonë ka pasur kërkesa që nëse kontributet e derdhura nuk shkojnë në rritjen e masës së pensionit, atëherë kjo kategori të përjashtohet nga derdhja e kontributit. “Duke analizuar këto propozime, por edhe duke vlerësuar se çdo përjashtim nga pagesa e kontributeve mund të krijojë probleme në tregun e punës dhe në administrimin fiskal, me projektin që paraqitet për shqyrtim vendoset që për çdo vit që pensionisti punon të marrë një shtesë mbi pension, e caktuar prej 2.4 % në vit”, saktësohet më tej në relacionin që shoqëron projektligjin.

PENSIONET Skema publike e pension- eve ofron tre lloje pensionesh: pensionin e pleqërisë, të invaliditetit dhe atë familjar. Për të fituar të drejtën e një pensioni pleqërie, individi duhet të kontribuojë për një periudhë sigurimi të përcaktuar jo më pak se 15 vjet dhe mund të marrë pension kur mbush moshën 65 vjeç për burrat dhe 60 vjeç e më lart për gratë, të cilat në vitin 2032 do të arrijnë moshën 65 vjet. Nga ky rregull bëjnë përjashtim punonjësit e nëntokës dhe nënat me shumë fëmijë, të cilat dalin në pension në moshën 50 vjeç. Gjithashtu, një kategori e veçantë e punonjësve që kanë punuar mbi 20 vite në industrinë e naftës, mund të marrin pension të parakohshëm në moshën 60 vjeç