Grida Duma: Pensionet rriten vetëm 2% dy muaj para zgjedhjeve
“Rritja e pensionit, nuk fillon zbatimi nga 1 janari, por dy muaj para zgjedhjeve vendore”
Partia Demokratike akuzoi qeverinë se me buxhetin e vitit 2019 ka parashikuar një rritje maksimale të pensionit në masën 2%.
Në një deklaratë për media nga selia e Partisë Demokratike, deputetja Grida Duma theksoi se rritja e pensionit nuk është në raport të drejtë me rritjen e çmimeve të ushqimeve, faturës së energjisë elektrike etj. "Në buxhetin 2019 deklarohet se pensionet do të indeksohen sipas inflacionit, pra maksimumi rritja vjetore do të jetë 2%. Gjatë këtyre pesë viteve, pensionet janë indeksuar si breshka me nga 2%, ndërsa çmimet dhe faturat e pensionistëve janë rritur deri në 42%. Një pensionist që sot paguan bukën 10% më shtrenjtë, ushqimet bazike deri në 35% më shtrenjtë, ujin 40% më shtrenjtë, energjinë 23% më shtrenjtë dhe i është shtuar edhe taksa e pronës, e për ironi në disa bashki paguan edhe taksë arsimi. Me 2% të indeksimit të pensionit nuk mund të përballojë rritjen mbi 42% të shpenzimeve të jetesës", tha Duma. Në vijim të deklaratës së saj, deputetja demokrate vijoi akuzat ndaj qeverisë se rritja e pensioneve nuk do të fillojë nga data 1 janar 2019, por në 1 prill të vitit 2019, duke e cilësuar këtë si një lëvizje elektorale, pasi hyn në fuqi dy muaj përpara zgjedhjeve vendore. "Pensionistët duhet ta dinë se as këtë indeksim minimal nuk do ta marrin që nga 1 janari, por vetëm dy muaj para zgjedhjeve. Shqipëria ren- ditet e fundit në rajon sa i përket vlerës mesatare të pensionit ( rreth 98 euro), në një kohë kur Maqedonia e ka rreth 191 euro dhe Bosnja rreth 179 euro", u shpreh ajo. Duma u ndal edhe te rritja e pagës minimale. Sipas saj, rritja e kufirit minimal të pagesë me 1 mijë lekë në muaj nuk është e mjaftueshme, duke iu referuar edhe të dhënave të Konfederatës së Sindikatave. "Paga minimale parashikohet të rritet me 10 mijë lekë, në një kohë kur shtrenjtimi i jetës kërkon një rritje minimale me 40 mijë lekë në muaj për të përballuar rritjen e çmimeve. Ashtu si është paraqitur nga Konfederata e Sindikatave, rritja e pagës minimale duhet të ishte 280 mijë lekë në muaj, nga 240 mijë që është aktualisht", tha Duma. Prej disa ditësh PD- ja ka vijuar akuzat ndaj buxhetit të shtetit, që po shqyrtohet në komisionet parlamentare. Duke qenë se opozita ka bojkotuar prej muajsh punimet e Kuvendit, ka zgjedhur një rrugë alternative për t'i bërë oponencë buxhetit për vitin 2019.