Shpërndanin heroinë te "21 Dhjetori", dy të arrestuar
Policia e Tiranës ka goditur mbrëmjen e së enjtes një tjetër rast të shpërndarjes së lëndëve narkotike të forta. Gjatë operacionit të koduar "Cleaner", janë sekuestruar 60 doza heroinë, si dhe dy pistoleta, një pushkë sportive me dylbi, municion luftarak, si dhe 140 mijë lekë të rinj. Operacioni i realizua nga Seksioni për Hetimin e Narkotikëve në Policinë e Tiranës, gjatë të cilit u arrestuan në flagrancë dy të dyshuarit Ermal Demushi, 35 vjeç dhe Emirjon Doçi, 29 vjeç. Burime zyrtare të Policisë thanë dje se oficerët e Antidrogës kishin grumbulluar informacion nga burime të ndryshme se shtetasit Ermal Demushi dhe Emirjon Doçi, në bashkëpunim me njëri- tjetrin, në zonën e "21 Dhjetorit", shisnin me doza lëndë narkotike të dyshuar si heroinë. Në bazë të këtyre informacioneve, është organizuar puna ku në afërsi të kryqëzimit të "21 Dhjetorit", në një lokal, janë kapur në flagrancë shtetasit Ermal Demushi dhe Emirjon Doçi. Gjatë kontrollit, shtetasit Emirjon Doçi iu gjetën 22 doza me lëndë narkotike të dyshuar heroinë, ndërsa shtetasit Ermal Demushi, një dozë me lëndë narkotike heroinë, si dhe 140 mijë lekë të rinj, të dyshuara si të përfituara nga shitja e lëndës narkotike. Kontrolli ka vijuar në dyqanin e shtetasit Ermal Demushi, ku mbi bazën e informacioneve dyshohej se kishte armë zjarri dhe nga kontrolli i kryer, iu gjet një sasi tjetër lënde narkotike e llojit Heroinë, një peshore elektronike, një dozë kanabis sativa, 5 kapsolla detonatorë me fitil, një armë zjarri pistoletë me mulli, një armë zjarri pistoletë e markës "Zastava", 12 fishekë, një fitil zjarr përcjellës, si dhe një sasi e vogël lënde eksplozive. Gjithashtu, po gjatë kontrollit të automjetit të shtetasit Ermal Demushi, në bagazhin e saj, u gjet një pushkë sportive me dylbi.