Kontrabanda çon në pranga 9 vetë, pesë janë doganierë
Kamioni me 2100 goma të përdorura kaloi nëpërmjet Doganës në Qafë Thanë
Kontrabandë gomash të përdorura, përfundojnë në pranga doganierët. Një kontroll policor i një kamioni teksa shkarkonte mallin në një magazinë, ka hedhur dritë mbi një mekanizëm trafikimi gomash të përdorura, pjesë e të cilit ishin edhe punonjësit e pikës doganore të Qafë- Thanës.
Pesë punonjës të kësaj pike doganore dhe 4 të tjerë, pjesë e këtij trafiku të mallrave kontrabandë, kanë përfunduar në prangat e Policisë. Rasti është zbuluar në fshatin Sovjan, teksa një kamion po shkarkonte goma të përdorura në një pikë magazinimi. Aksioni është realizuar pas disa muaj hetimesh, ku SHÇBA dhe Policia e Korçës kishin sinjalizime për veprimtarinë e paligjshme, ndërsa kanë ndërhyrë në momentin e flagrancës duke dokumentuar rastin. Sipas njoftimit të dhënë, trafiku kryhej përmes pikës kufitare të Qafë- Thanës, ndërsa Policia ka sekuestruar 2100 goma të përdoruara. Zbulimi i mekanizmit të kontrabandës ka bërë që të arrestohen Stefan Hila me detyrë përgjegjës turni, Anesti Tushinka me detyrë doganier parkingu, Ilir Spahiu me detyrë doganier në Doganën e QafëThanës, Lefter Duraj me detyrë përgjegjës turni i grupit të antikontrabandës dhe Mikel Goxharaj me detyrë inspektor i grupit të antikontrabandës ( të dy pranë Drejtorisë së Përgjithshme të Doganave). Përveç punonjësve të Doganës, Policia ka arrestuar edhe Kelti Ristanin me detyrë agjent doganor i një kompanie me seli në Degën Doganore Qafë- Thanë, i cili dyshohet se ka falsifikuar dokumentacionin shoqërues doganor të kamionit. Gjithashtu janë arrestuar edhe Edmond Kodra poseduesi i gomave, Stojmir Treneski shoferi i kamionit, si edhe Petraq Dimko poseduesi i ambientit ku magazinohej malli kontrabandë.
Policia zyrtarisht bëri me dije se “Arrestimi i 9 personave u krye, pasi në bashkëpunim me njëri- tjetrin, dyshohet se kanë bërë të mundur futjen kontrabandë të një kamioni me rreth 2100 goma të përdoruara, nëpërmjet Pikës së Kalimit Kufitar QafëThanë, të ngarkuara në mjetin tip kamion me drejtues shtetasin Stojmir Treneski, i cili u ndalua mbrëmjen e djeshme nga shërbimet e Policisë në aksin rrugor PogradecMaliq, pranë fshatit Sovjan, teksa po tentonte të shkarkonte mallin e kontrabanduar në magazinën e Petraq Dimkos”. Mësohet se Policia po vijon hetimet për të parë nëse ka pasur edhe kalime të tjera të paligjshme mallrash, ndërsa për 5 punonjësit e Doganës rëndon akuza e “shpërdorimit të detyrës”.
Aksioni është realizuar pas disa muaj hetimesh, ku SHÇBA dhe Policia e Korçës kishin sinjalizime për veprimtarinë e paligjshme, ndërsa kanë ndërhyrë në momentin e flagrancës duke dokumentuar rastin