Shisnin drogë “çokollatë” në Tiranë, arrestohen 5 persona
Malli do të tregtohej në zonat e lokaleve të kryeqytetit
Nga hetimet e kryera, shtetasit Arben Metaj dhe Martin e Sokol Bushi dyshohej se, pasi kishin siguruar një sasi lënde narkotike të presuar në formë çokollate në Vlorë, do ta transportonin atë me ndihmën e një automjeti tip "Kamionçinë" drejt Tiranës, sipas Policisë
Policia e Vlorës, së bashku me strukturat e Policisë së Shtetit kanë finalizuar ditën e djeshme një operacion antidroge, duke goditur një grup prej pesë personash që merreshin me shitjen dhe blerjen e narkotikëve.
Gjithashtu, Policia sekuestroi edhe një sasi prej 50 kilogramësh lëndësh narkotike e përpunuar, e quajtur ndryshe drogë "çokollatë". Agjentët e Policisë së Shtetit ishin vënë në ndjekje të personave të dyshuar që në qytetin e Vlorës, aty ku ishte mbledhur droga e kultivuar dhe më pas ishte përpunuar në formën e çokollatës. Agjentët kishin marrë informacion në rrugë të ndryshme se ngarkesa në fjalë do të transportohej në Tiranë, ku do të blihej nga disa persona të tjerë. Këta të fundit, do ta tregtonin drogën në zonat e lokaleve në kryeqytet për konsum të brendshëm. Sipas një njoftimi të Policisë, në pranga kanë rënë tre vlonjatë dhe dy tiranas që prisnin drogën. Më konkretisht, të arrestuarit janë: Sokol Bushi, 23 vjeç, Arben Metaj, 47 vjeç dhe Martin Bushi nga Vlora. Ndërsa dy pritësit janë Edi Tafa 22 vjeç dhe Renaldo Gecaj 42 vjeç banues në Tiranë.
"Seksioni për Hetimin e Narkotikëve në Drejtorinë Vendore të Policisë Vlorë në bashkëpunim me Drejtorinë e Forcës së Posaçme Operacionale të Departamentit të Policisë Kriminale dhe Drejtorinë Vendore të Policisë Tiranë me anë të metodave speciale të hetimit kanë finalizuar operacionin policor antidrogë, ku si rezultat u arrestuan në flagrancë 5 persona", shkruan një njoftim i Policisë.
Operacioni policor anti- drogë, fillimisht, ka nisur në Vlorë nga Seksioni për Hetimin e Narkotikëve, ku nga hetimet e kryera, shtetasit Arben Metaj dhe Martin e Sokol Bushi, dyshohej se pasi kishin siguruar një sasi lënde narkotike të presuar në formë çokollate në Vlorë, do ta transportonin atë me ndihmën e një automjeti tip "Ka- mionçinë" drejt Tiranës, sipas Policisë. "Falë punës së mirëorganizuar, ka filluar ndjekja nga ana e Seksionit të Hetimit të Narkotikëve në bashkëpunim të ngushtë me forcat e tjera të Policisë së Shtetit, nga Vlora në drejtim të Tiranës me qëllim kapjen dhe të personave që do blinin lëndën narkotike. Policia ka mbajtur nën vëzhgim personat që transportonin lëndën narkotike dhe në momentin kur shtetasit Renaldo Gecaj dhe Edi Tafa, në Tiranë do blinin lëndën narkotike, Policia ka ndërhyrë duke arrestuar të gjithë shtetasit e përfshirë në këtë rast të shitblerjes së lëndëve narkotike", shkruan më tej në njoftim Policia.