Zjarret në Kaliforni, ka më shumë se 1000 njerëz të zhdukur
Lista me emrat e njerëzve që rezultojnë të zhdukur si pasojë e një prej vatrave më të mëdha të zjarrit në Camp, në Kaliforninë Veriore përfshin tashmë 1,011 regjistrime. Deklarata u bë nga autoritetet lokale. Sipas sherifit të qarkut, lista është e papërfunduar dhe do të luhatet në numër sepse të dhënat janë të papërpunuara. Numri i të vdekurve të konfirmuar nga zjarri është tani 71 vetë, pasi tetë grupe eshtrash janë gjetur gjatë të premtes. Tre vdekje të tjera ndodhën në vatrën e zjarrit në Woolsey, në Kaliforni të Jugut, duke e çuar numrin e vdekjeve në shkallë vendi nga zjarri në 74 veta. Me më shumë personel të aftë për të marrë raporte nga telefonatat dhe emailet, dhe me shtimin e emrave nga thirrjet në numrin e Policisë 911 në ditën e shpërthimit të zjarrit, tashmë në listën e të zhdukurve janë shtuar qindra emra për ditën e dytë radhazi. Camp Fire, i cili është zjarri më vdekjeprurës dhe më shkatërrues në historinë e shtetit të Kalifornisë, ka shkatërruar rreth 9,700 shtëpi dhe ka djegur 146,000 hektarë territor. Një raport nga Agjencia Shtetërore e Zjarrfikësve tha se, “Zjarrfikësit po vazhdojnë të përparojnë në luftën kundër flakëve”. Qindra policë, trupa të Gardës Kombëtare, antropologë dhe mjekë janë duke kërkuar nëpër mbetjet e shtëpive të shkrumbuara dhe makinat e prishura për njerëz apo kufoma. Presidenti Donald Trump ka në plan ta vizitojë rajonin me guvernatorin e vjetër Jerry Brown dhe atë të sapozgjedhur, Gavin Newsom. Tymi nga zjarri i madh ka bërë që disa universitete të anulojnë ose shtyjnë ngjarjet sportive.