Spahia: Vangjush Dako e ka vendin në burg, provat te dosja 339
Në një kohë kur partitë po përgatiten për zgjedhje, Partia Demokratike ka vijuar akuzat e saj ndaj kryetarit të Bashkisë së Durrësit, Vangjush Dako. Ditën e djeshme, nga selia blu doli demokrati Bardh Spahia, i cili tha se kreu i Bashkisë së Durrësit duhet të jetë pas hekurave, pasi ka kryer një krim elektoral në zgjedhjet e vitit 2017. "Vangjush Dako është emblema e kësaj qeverie të dalë nga votat e blera të shqiptarëve të varfër. Vangjush Dako nuk duhet të qëndrojë më as edhe një orë në krye të Bashkisë së Durrësit. Vendi i tij është vetëm qelia e burgut. Vangjush Dako është vula e zgjedhjeve të marra peng nga paratë e drogës dhe krimit dhe për këtë krim elektoral, ligji parashikon vetëm burgun. Drejtësia duhet të veprojë vetëm me një standard ndaj Vangjush Dakos, me standardin e prangave dhe ndëshkimin e krimit elektoral",- tha Spahia. Në vijim të deklaratës së tij, deputeti i PD- së iu referua sërish dosjes së Prokurorisë me numër 339, ku sipas tij, aty janë provat ku faktohen akuzat ndaj kreut të Bashkisë së Durrësit Vangjush Dako. "Dosja 339 është gjurma e pastër e krimit elektoral, që është kryer në masë në zgjedhjet e vitit 2017. Autor i këtij krimi është kryebashkiaku Vangjush Dako, që bashkë me bandën e Avdylajve dhe kriminelë të tjerë, morën peng vullnetin real të zgjedhësve në Shijak dhe Durrës. Biseda telefonike e shkurtit me Altin Avdylajn, i njohur si Niçja, ku i premton dhe favore. Falënderimet pas zgjedhjeve të datës 27 qershor po me Niçen, për të falënderuar kryekapobandën Astrit Advylaj. Mesazhet me Cinen, Jasin Avdylin për të ndërhyrë te FNSHja dhe komunikime të tjera të zbardhura në dosjen 339, janë disa nga faktet e ajsbergut të provave sesi u asgjësuan zgjedhjet, pra vullneti i lirë i shqiptarëve në votime. Pa burgosjen e Vangjush Dakos dhe vangjushëve të tjerë që blenë votat për pushtetin e Edi Ramës, nuk mund të ketë asnjë premisë për proces normal politik në vend",- tha Spahia.