PD dhe PS përplasen para “Venecias” për vetingun në politikë
Hysi: Kemi vullnetin për nxitjen e zbatimit të Reformës në Drejtësi, presim edhe opinionin e Komisionit të Venecias
Komisioni i Venecias zbarkoi dje në Tiranë për të marrë mendimet e partive parlamentare për propozimin e opozitës për vetingun në politikë.
Sipas axhendës së përcaktuar, ekspertët ndërkombëtarë i zhvilluan të gjitha takimet e tyre brenda Kryesisë së Kuvendit, duke risjellë pas shumë muajsh opozitën në Parlament.
MAXHORANCA Në emër të Kuvendit të Shqipërisë, përfaqësuesit e Komisionit të Venecias i priti zëvendëskryetarja e Kuvendit, Vasilika Hysi. Ndonëse takimi nuk ishte i hapur për mediat, në njoftimin për shtyp të Kuvendit bëhet me dije se socialistja Hysi u ka parashtruar qëndrimin se paketa e Reformës në Drejtësi e ka aktualisht hetimin për zyrtarët e lartë shtetërorë. “Hysi bëri një paraqitje të përmbledhur të risive të Reformës në Drejtësi në fushën e parandalimit, hetimit dhe dënimit të veprave penale të korrupsionit dhe të lidhjeve të funksionarëve të lartë me krimin e organizuar, goditjen e pasurive që burojnë nga veprimtari kriminale, përshirë veprat penale të korrupsionit, ndryshimet në ligjin për deklarimin e pasurive, nën Kodin Penal dhe atë të Procedurës Penale”, thuhet në njoftimin e Kuvendit. Por ekspertët e Komisionit të Venecias kërkuan një qëndrim të prerë nga ana e Hysit nëse është pro nismës së propozuar nga opozita apo jo. Sipas njoftimit të Kuvendit, zëvendëskryetarja e Kuvendit ishte për zbatimin e Reformës në Drejtësi dhe jo ndryshimeve të tjera ligjore, por se opinioni i Komisionit të Venecias do të jetë vendimtari për këtë çështje. “Të pranishmit kërkuan të dinë nëse ka një qëndrim nga ana e maxhorancës lidhur me nismën ligjore të opozitës. Në këtë pikë, Hysi i bëri me dije delegacionit se maxhoranca ishte në pritje të opinionit të Komisionit të Venecias. Hysi shprehu vullnetin për nxitjen e zbatimit të Reformës në Drejtësi dhe për fillimin sa më shpejt nga funksioni të organeve të reja të sistemit të drejtësisë”,- thuhet në njoftimin e Kuvendit. Krahas Vasilika Hysit, përfaqësuesit e Komisionit të Venecias morën mendimin edhe të kryetarit të Komisionit të Ligjeve, Ulsi Manja. Pas takimit, Manja dha një deklaratë për mediat ku u shpreh se grupi i PS- së do t’u japë zyrtarisht ekspertëve të huaj opinionin e tyre mbi kërkesën e opozitës për të bërë vetingun në politikë. “Ne shpresojmë dhe besojmë në kompetencën e Komisionit të Venecias për ndryshimet kushtetuese. Shpjegimet dhe mendimet tona do t’ua dorëzojmë. Ne e mirëpresim opinionin e Venecias, si tabani i demokracisë. Ne vazhdimisht jemi konsultuar dhe kemi marrë opinionin e Venecias.
OPOZITA Pas një mungese disamujore, në Kryesinë e Kuvendit erdhi delegacioni i Partisë Demokratike, i cili zhvilloi një takim me ekspertët e Komisionit të Venecias. Në krye të përfaqësuesve të PDsë ishte kryetari i grupit, Edmon Spaho, i cili pas takimit dha detajet e tij mbi bisedën e zhvilluar. “Nuk duhet të ketë dy standarde, por ai që zbatohet për prokurorët dhe gjyqtarët të aplikohet edhe për politikanët, kur flasim për lidhje me botën e krimit të organizuar. Ne shpjeguam që asnjë reformë nuk do të ketë sukses nëse nuk do të shkëputen lidhjet e politikës me krimin”, deklaroi Spaho për mediat”.