Vetingu në politikë, kushti i panegociueshëm i PD për bojkotin

Miratimi i ndryshimeve kushtetuese që do të hapi rrugë për të bërë rivlerësimin e politikanëve, apo i njohur ndryshe si vetingu në politikë, është kushti i vendosur nga opozita për t’iu rikthyer jetës parlamentare dhe për të thyer bojkotin disamujor. Kur tanimë ditët kanë filluar të numërohen pa kalkulime të vështira përsa i përket afatit të mbetur nga opozita para se të shkojë në vijën e kuqe ku i digjen mandatet, takimi me ekspertët e Komisionit të Venecias shihet si drita jeshile për rikthimin e normalitetit të jetës parlamentare. Në datën 14- 15 dhjetor do të zhvillohet sesioni plenar i Komisionit të Venecias, ku do të prezantojë edhe opinionin e saj mbi kërkesën e opozitës për ndryshimin e Kushtetutës përsa i përket vetingut në politikë. Kjo përkon me limitet e afateve që ka opozita, pasi nëse kalohet, digjen mandatet e opozitës sepse mbushet 6- mujori i bojkotit opozitar. Opozita nga ana e saj e ka vendosur si kusht të panegociueshëm vetingun në poli- tikë. Vetë kreu i PD- së ka theksuar se pa miratuar ligjin që sipas tij largon krimin nga politika, nuk mund të ketë rikthim të opozitës në Parlament. “Zgjidhja politike është aty. Ne nuk kërkojmë asgjë më shumë se standardi që miratuan për prokurorët dhe gjyqtarët. I njëjti standard që Venecia rekomandoi për këta, i njëjti standard që bëri ligj për policët dhe gardistët, i njëjti standard duhet të vleje për politikën. Kjo është vijë e kuqe për opozitën. Trajtim preferencial për politikanët nuk ka për të pasur”,- është shprehur Basha. Kësisoj, qëndrimi i ndërkombëtarëve mbi këtë çështje pritet që të sjellë edhe reagimin e politikës shqiptare për tejkalimin e krizës institucionale, ku opozita vijon bojkotin e saj parlamentar, duke refuzuar pjesëmarrjen në jetën parlamentare, ndërsa maxhoranca vijon e vetme miratimin e ligjeve.