Vdiq në Komisariat, babai dorëzon CD me pamje të dhunës

KORÇE - Ekspertiza nxori si shkak të vdekjes problemet me zemrën, por prindërit e Enea Ftojit dorëzojnë provat në Prokurorinë e Korçës. 27- vjeçari Ftoji ndërroi jetë në Komisariatin e Korçës më 17 maj të këtij viti, ndërsa ishte arrestuar për vjedhje me dhunë. Në përfundim të hetimeve, ekspertiza arriti në konkluzionin se vdekja e të riut nuk kishte ardhur si pasojë e dhunës, por për shkak të një problemi në zemër. Por, babai i të riut pretendon se i biri është dhunuar nga forcat e Policisë. Ai ka depozituar pranë oficerit të Policisë Gjyqësore një CD me pamje filmike të trupit të të ndjerit, ku sipas familjarëve konstatohen shenjat e dhunës si edhe një kërkesë më shkrim për zbardhjen e së vërtetës. Gjithashtu, ai kërkon që të merret në pyetje dhe gruaja, së cilës, i biri i vodhi një gjerdan si dëshmitare okulare e dhunës së ushtruar nga Policia. "I çova Prokurorisë prova që vërtetojnë dhunën e ushtruar nga Policia. I kërkova Prokurorisë të pyesë si dëshmitar edhe gruan, së cilës Enea i vodhi varësen. Ajo e ka parë kur Policia e dhunoi Enean në mes të pazarit. Akuzoj tetë policë të Komisariatit të Korçës për vdekjen e djalit", u shpreh ai. Ndërkaq edhe Mimoza Ftoji, e ëma e viktimës, ka apeluar që personat përgjegjës të identifikohen dhe të ndëshkohen për vdekjen e djalit të saj. "Djalin ma vrau Policia dhe nuk vdiq për shkaqe natyrore. Nëse nuk zbardhet e vërteta, do hakmerrem. Gjaku lahet me gjak", deklaroi e ëma e 27- vjeçarit. Në bazë të ekspertizës, Enea Ftoji ka ndërruar jetë për shkak të ndalimit të menjëhershëm të zemrës nga ishemia akute e miokardit. Gjithashtu analizat treguan se 27- vjeçari ka qenë nën efektin e heroinës. dh. ç