Shashka dhe shkopinj para Parlamentit, kush është policja 24 vjeçe që humbi dy gishtat
PLAGOSEN DHJETERA POLICE E PROTESTUES, ULTIMATUMI I RAMES: U KALUA VIJA E KUQE
Protesta e djeshme e banorëve të zonës së Unazës së Re të Tiranës doli jashtë parashikimeve të Policisë.
Ndonëse zëvendësministri i Brendshëm, Sandër Lleshi, në bashkëpunim me drejtorin e Policisë së Shtetit, Ardi Veliu, kishin marrë masat për parandalimin e procedimit në dhunë, sërish kjo nuk u shmang. Autokolona të Policisë së Forcave të Ndërhyrjes së Shpejtë ishin parkuar përgjatë bulevardit “Bajram Curri” dhe efektivët e Policisë ishin stacionuar para traut të Parlamentit për të ndaluar hyrjen e protestuesve brenda ambienteve të sallës së seancës plenare. Nga protestuesit u bënë dy tentativa për të hyrë brenda ambienteve të Parlamentit. E para i gjeti të papozicionuar mirë forcat e Policisë. Protestuesit e nisën që në fillim me hedhjen e shashkave ndaj policëve dhe u nisën për të hyrë brenda në Parlament. Policia arriti t’i ndalte ata, pasi edhe vetë banorët e Unazës nuk ishin mbledhur të gjithë para godinës. Me fillimin e konfrontimit të parë, 5 kordonë të FNSH- së u pozicionuan pas efektivëve të Policisë së Rendit dhe forcave “Shqiponja”, të cilët përbënin pritën e parë ndaj tyre. Pas shumë thirrjeve me megafon të protestuesve për të hyrë në Parlament, ku njëri ndër to ishte “Djemtë dhe burrat të vijnë përpara për të çarë Policinë”. Pas kësaj thirrjeje, ata morën në duar shkopinjtë e dërrasës dhe filluan të godisnin policinë duke i shtyrë ata. Protestues nga prapavija hidhnin shashka në drejtim të Policisë si edhe tymuese. Pas plagosjes së efektives së Policisë, kordoni i policëve të rendit dhe forcave “Shqiponja” u zëvendësuan nga 5 kordonët e FNSH- së, të cilët arritën të spostonin protestuesit duke mos i lënë që të futen në brendësi të ambienteve të Parlamentit. Një nga efektivët e Policisë doli me megafon, duke u kërkuar protestuesve të mos ushtronin dhunë ndaj policisë. “Ju lutem, mos ushtroni dhunë ndaj policisë, po bëjmë detyrën tonë. Mos hidhni shashka, disa policë janë plagosur”, u shpreh efektivi. Por kjo nuk u besua nga ana e protestuesve, të cilët filluan të akuzonin edhe policinë. Gjatë zhvillimit të in- cidenteve, ishin të shumtë forcat e rendit të veshur si civilë dhe me aparate telefoni në dorë filmonin të gjithë ngjarjen për të evidentuar personat që ushtronin dhënë gjatë përplasjes.
Në një kohë kur në Parlament po zhvillohej konfrontimi i parë ndërmjet protestuesve dhe policisë, kryetari i Partisë Demokratike, nga një aktivitet partiak që po zhvillonte pak metra më tutje, nisi disa deputetë të opozitës në mbështetje të protestuesve. Deputetët e PD- së dhe LSI- së u futën në mes të turmës për të qetësuar situatën, duke u shndërruar në një amortizator të konfrontimit të protestuesve me policinë.