Skandali në ish- Bllok, Salianji: Mafia po i grabit pronën qytetarit
Pa vendim Gjykate, përmbaruesi rrethon objektin dhe ka nisur prishjen e investimit, duke shkaktuar dëm të madh pasuror
Partia Demokratike ka reaguar pas denoncimit të skandalit që po ndodh në qendër të zonës së ish- Bllokut në Tiranë, ku një biznesmeni po i merret prona në posedim, pa asnjë vendim gjykate dhe pa ligj.
Deputeti i PD- së Ervin Salianji është takuar gjatë kësaj të enjteje me përfaqësuesit e biznesit privat në qendër të zonës së ish- Bllokut, prona e të cilit është rrethuar prej disa ditësh nga një përmbarues privat, i cili i ndihmuar nga Policia e Shtetit dhe ajo Bashkiake po dëmtojnë një objekt me kontratë të rregullt pronësie. Salianji tha se duke mos respektuar ligje, norma dhe Kushtetutë, qeveria dhe institucionet e shtetit po shkatërrojnë bashkëjetesën normale. "Mafia e pronave. Miliona euro para nga krimi dhe korrupsioni kërkojnë troje dhe prona. Në qendër, në mes te Bllokut, apo në periferi e njëjta bastisje. Në të njëjtën mënyrë dhe me të njëjtat mjete në ish- Bllok, tek e vetmja hapësirë e mbetur pa beton, sot Policia e Shtetit dhe Policia Bashkiake i rrëmbejnë pronën në posedim qytetarit dhe e rrethojnë forcërisht për interesa të mafies së ndërtimit, pa vendim gjykate, pa ligj. Po shkatërrojnë bashkëjetesën normale duke mos respektuar as Kushtetutë, as ligj, as norma. Askush mos të mendojë që do të shpëtojë nga marrja e vendimeve të paligjshme", tha Salianji. Biznesmeni në zonën e ish- Bllokut ka lidhur një kontratë qiraje 20- vjeçare me shtetin, kontratë e cila i njeh investimin, është në gjyq me disa pretendues të tjerë për pronësinë e truallit. Por në momen- tin kur është bërë vetëm sigurimi i padisë dhe nuk ka asnjë vendim të formës së prerë nga gjykata, gjyqtarja Dhurata Balla jep një masë sigurimi që është identike me objektin e zgjidhjes së çështjes, për të cilën palët janë në proces gjyqësor. Qiramarrësit e kanë apeluar vendimin, por gjykatësja Dhurata Balla nuk e ka çuar dosjen në sekretari, që kjo e fundit t'ia çojë Apelit. "Panorama" kontaktoi me përfaqësues të biznesit, i cili është rrethuar nga përmbarimi, të cilët theksojnë se në mënyrë të kundërligjshme Policia e Shtetit po lejon përmbaruesit të prishin objektin, ndonëse nuk ka një vendim gjykate të formës së prerë, që e legjitimon këtë veprim. "Shoqëria përmbarimore LDC me përmbarues Lefter Canaj në kundërshtim me ligjin, por edhe me bekimin e Policisë Bashkiake dhe Policisë së Shtetit kanë vijuar prishjen e biznesit. Pa pasur asnjë vendim gjykate dhe në mënyrë të kundërligjshme, kjo shoqëri jo vetëm që e rrethon objektin, por ka nisur prishjen e investimit, duke shkaktuar një dëm të konsiderueshëm pasuror", thotë pala e dëmtuar.