Përplasja me Policinë, në pranga 11 protestues
Mes të arrestuarve, një vajzë 30- vjeçare dhe një minoren
Policia e Tiranës ka arrestuar 11 protestues ditën e djeshme pas përshkallëzimit të protestës së banorëve të "Unazës së Re", që preken nga projekti i zgjerimit të rrugës.
12 efektivë policie u plagosën nga përplasja mes protestuesve dhe uniformave blu, ndërkohë që këto të fundit ishin të papërgatitur në mjete për përballimin e sulmeve me kapsolla dhe sende të forta. Burimet thonë se për protestën u angazhuan rreth 2 mijë policë, që megjithatë nuk e menaxhuan në mënyrën e duhur situatën. Pas përfundimit të përplasjes, Policia reagoi duke arrestuar 11 protestues, ku mes tyre janë një vajzë 30- vjeçare dhe një adoleshent. Gjithashtu, mes të arrestuarve është edhe një person tjetër i shpallur në kërkim për tubime të paligjshme. "Policia e Tiranës, pas përshkallëzimit të protestës përballë godinës së sallave plenare të Kuvendit të Shqipërisë, protestë e cila u përshkallëzua në akte dhune, ku për pasojë u plagosën 12 punonjës policie, mes tyre dy në gjendje më të rëndë, si dhe u lënduan lehtë 3 protestues, informon se Shërbimet e Policisë Tiranë kanë shoqëruar 11 shtetas", shkruante një njoftim i Policisë së Tiranës ditën e djeshme pas mesditës. "Nga tërësia e veprimeve të para hetimore të kryera nga specialistët për hetimin e krimit, nën drejtimin e Prokurorisë u bë arrestimi në flagrancë i tyre dhe konkretisht: Alban Ahmetcenaj, 36 vjeç; P. A., 17 vjeç; Fluturim Goleci, 30 vjeç; Rruzhdi Daci, 53 vjeç; Marsel Villari, 28 vjeç; Erjona Dozhani, 30 vjeç; Lulzim Dozhani, 45 vjeç; Dorjan Protoduari, 30 vjeç ( i shpallur më parë në kërkim nga Komisariati i Policisë nr. 6, për veprën penale "Organizimi dhe pjesëmarrja në grumbullime dhe në manifestime të paligjshme"); Ali Nalic, 35 vjeç; Amarildo Sinanaj, 30 vjeç; Shpati Bilbili, 31 vjeç", vijon më tej Policia. Të arrestuarit akuzohen për veprat penale "Plagosje e rëndë me dashje", "Organizimi dhe pjesëmarrja në grumbullime dhe në manifestime të paligjshme", "Prishje e rendit dhe qetësisë publike" si dhe "Goditja për shkak të detyrës". Policia njoftoi dje gjithashtu se do të vijojë puna për identifikimin dhe shoqërimin e personave të tjerë, që kanë ushtruar dhunë ndaj punonjësve të Policisë. Për këtë arsye, janë marrë pamjet filmike të godinës së Parlamentit dhe bizneseve përreth. Gjithashtu, Prokuroria e Tiranës ka nisur hetimet gjithashtu për rastin dhe ka marrë në pyetje efektivët e Policisë që u plagosën dhe u trajtuan në Spitalin e Traumës. Policia bëri thirrje ditën e djeshme ndaj protestuesve dhe përfaqësuesve të partive politike, që të distancoheshin nga dhu- na dhe nga goditjet ndaj punonjësve të Policisë. "Policia e Shtetit është e vendosur për të mos toleruar akte të tilla dhune ndaj punonjësve të Policisë si dhe për të mos lejuar më bllokimin e rrugës, duke penguar qarkullimin e lirë të qytetarëve dhe të automjeteve", përfundonte njof- timi. Prej më shumë se 20 ditësh, disa banorë të zonës së "Unazës së Re" kundërshtojnë me protesta dhe bllokim rrugësh projektin për zgjerimin e "Unzës së Re" dhe ndërtimin e disa mbikalimeve. Projekti prek rreth 300 banesa, pjesa më e madhe e të cilave nuk janë legalizuar, apo janë në proces legalizimi. Banorët e këtyre banesave pretendojnë se nuk do t'u jepet dëmshpërblim. Kjo ka bërë që prej 20 ditësh të dalin në protesta, duke bllokuar rrugët. Kohët e fundit, protestës i janë bashkuar edhe deputetë të opozitës dhe përfaqësues të caktuar të shoqërisë civile.