Protesta, Rama: U tejkalua vija e kuqe, s'ka kompensim për ndërtimet pa leje
Ultimatumi nga kreu i qeverisë: Kush ka ngrehina, të largohet sa më shpejt që aty, të mos na dalë përpara
Plagosja e efektives së Policisë, e cila humbi gishtat e njërës dorë, u cilësua nga Kryeministri Rama si tejkalim i vijës së kuqe.
Ditën e djeshme Rama vizitoi në Spitalin e Traumës efektiven e Policisë Ina Nuka, e cila mbeti e plagosur gjatë protestës së djeshme të banorëve të Unazës së Re përpara ambienteve të seancës plenare. "Besoj që çdo prind dhe çdo familje e parafytyron se çfarë do ndjente nëse vajza 24- vjeçare do kthehej në shtëpi pa gishtat e dorës, të këputur. Kjo është një situatë që nuk ka ndodhur në Shqipëri, qysh kur kanë filluar prishjet masive për interes publik, që nga parku "Rinia" dhe me radhë. Pavarësisht kush ka qenë në qeveri, është hera e parë që një parti politike merr përsipër, bashkë me një grup njerëzish, - ku ka një pjesë që janë zaptues profesionistë trojesh dhe një pjesë tjetër janë të ngatërruar e të keqkuptuar pa lidhje, kundër interesit publik, - për të frenuar zhvillimin e një vepre që nuk kanë për ta frenuar dot. Prerja e gishtave të vajzës është vërtet një vijë e kuqe që është vendosur sot mes atyre që kanë marrë përsipër t'i kundërvihen ligjit dhe Policisë së Shtetit, që është në mbrojtje të ligjit dhe në mbrojtje të interesave publike dhe të komunitetit", u shpreh Rama.
SEANCA Ditën e djeshme, duke shfrytëzuar foltoren e Kuvendit, Kryeministri Rama i dha përgjigje situatës së krijuar për banorët e zonës së Astirit, të cilët po protestonin jashtë sallës së seancave plenare. Në fjalën e tij, Rama u shpreh se protestuesit nuk janë pronarë dhe nuk do të zbatohet skema e dëmshpërblimit si në rastin e ish- pronarëve. "Në Unazën e Re, të gjithë këta që përmenda plus të tjerët që nuk i përmenda, kanë zaptuar prona të pronarëve të vjetër. Ku janë shoqatat e pronarëve? Ata që dalin dhe flasin për çdo gjë, duan edhe Amfiteatrin e Butrintit t'ua kthejmë, pse nuk flasin sot? Sepse në fund të ditës, ata si pronarë të vjetër do marrin dëmshpërblimin, nuk do marrin këta që kanë zaptuar. Asnjë kokërr leku nuk kanë për të marrë këta. Ata do ta marrin dëmshpërblimin", tha Rama duke shtuar se në këtë zonë janë legalizuar 40 godina në periudhën korrik- shtator 2013, kohë në të cilën po bëhej tranzicioni politik nga qeveria "Berisha" në atë "Rama 1". Duke komentuar qëndrimin e Lulzim Bashës për dëmshpërblimin e të gjithë ban- orëve, edhe atyre që janë pa certifikatë legalizimi, Rama u shpreh se kjo do të sillte kolaps financiar. "Një gjë di të them unë, nëse hapet kjo e nëse për një moment mendojmë çmendurinë që të dëmshpërblejmë çdo zaptues të territoreve me interes publik, nuk dalin më, nuk dalin më buxhetet e 25 viteve të ardhshme për të bërë një gjë, një më shumë sesa është bërë në të shkuarën", tha Rama. Kryeministri Rama reagoi edhe ndaj akuzave të ngritura mbi çmimin e lartë të ndërtimit të Unazës së Re. Sipas tij, rruga po ndërtohet sipas standardit A, duke lëshuar edhe ultimatumin e tij për protestuesit. "Për ata të Unazës së Re, duhet të jetë shumë e qartë. Kush ka titull pronësie, do të marri dëmshpërblimin sipas ligjit dhe pikë, e do largohet që aty. Kush nuk ka titull pronësie dhe ka vetëm një strehim, do të marrë 3 vjet bonus qiraje. Kush pastaj ka ngrehina të kategorisë së Bashkimit, Kujtimi, Agronit, Edmondit, Ramazanit, të largohet sa më shpejt që aty, të mos na dali përpara", tha Rama