Berisha: Asnjë iluzion për këtë qeveri, rruga e vetme është përballja
Ish- Kryeministri Berisha tha dje se nuk duhet të ketë asnjë iluzion me qeverinë aktuale dhe se rruga e vetme është përballja me të. Duke folur në seancën paralele për buxhetin e 2019- s të organizuar nga Partia Demokratike, ishKryeministri tha se vendi është kthyer në një megapiramidë. "Vendi qeveriset nga një kriminel skizofren. Ai ka një energji të pashtershme negative. Ne duhet të ngrihemi që të largojmë narkoqeverinë sepse po vret shqiptarët dhe po vret biznesin. Narkoshteti blen politikanë, bën ligje, dikton konkurrencën. Duhet të përballemi me këtë qeveri dhe s'duhet të kemi asnjë iluzion, përballja është rruga e vetme me këtë qeveri. Sa më shumë vonohemi, aq më e lartë bëhet kostoja për shqiptarët", tha Berisha. Sipas tij, ekonomia shqiptare ka hyrë në një kolaps të plotë. "Shqipëria sot është piramidë në kuptimin e biznesit. Imagjinoni për një moment të 6 buxhetet së bashku. Kemi të bëjmë me një piramidë financiare të rrezikshme, identike me piramidën greke. Borxhi publik arrin në 85 për qind. Më në fund, Banka e Shqipërisë shprehu qëndrimin e saj, të gjitha PPP- të e llojit të Edi Ramës janë borxh, nga 85% borxhi do të shkojë në 100%. Kjo ekonomi me këtë zhvillim mizerabël, që ka nuk do ta përballojë dot", tha Berisha. Sipas tij, vendi kontrollohet nga bandat që kontrollojë ekonominë dhe politikën e vendit. "Kjo ekonomi është drejt kolapsit dhe do të na zërë të gjithëve brenda. Kjo piramidë drejtohet nga organizata më kriminale e të gjitha kohërave. Kjo qeveri që ndërton këtë megapiramidë, është e lidhur me qindra banda që kontrollojnë ekonominë dhe politikën", tha Berisha.